Биыл Ескелді ауданының шаруа- лары 53 мың гектардан аса жерге дән септі. Оның 30 мың гектарға жуығы масақты дақылдарға тиесілі. Қазір жерден ел ырысын жиғандар 26,3 гектардағы өнімді қамбаға құйды. Орташа өнімділік әр гектарға 17 центнерден. Ескелді ауданының ауыл шаруашылығы мен жер қатынастары бөлімінің бас маманы Қанат Сатығұловтың айтуынша, биыл мұндағы шаруалар 45 мың тоннадай өнім жиыпты. Одан бөлек, диқандар 14,2 мың гектарға майлы дақыл дәнін сепкен. Қазір оның 10 мың гектарға жуығы жиналған. Аудан шаруаларының маңдай тері ақталып, әр гектарына 21,3 центнерден өнім алуда.
– Күзгі жиын-терін қарқынды. Әзірге жауынның жоғы қуантады. Шаруалардың егінін қиындықсыз жинауына қарасып тұр. Қазір диқандар көкөніс пен бақша дақылдарын толық жиып алды. 1 мың гектарға бақша дақылдары, 1,1 гектарға картоп егілген еді. Ескелділік шаруалар осынша егістіктен 23,2 мың тоннадай картоп, 26,3 мың тоннадай бақша өнімін жинады. Қазір егін жинаумен қатар күзгі егу жұмыстары жүргізілуде. Жоспарға сай 6,5 мың гектарға күздік бидай себу, 18,1 гектар сүдігер жырту жоспарланған. Қазір дала еңбеккерлері 4 мың гектарға дән сеуіп, 14,5 мың гектар жерді жыртты, – дейді Қанат Сатығұлов.
Аудан маманының сөзіне сенсек, шаруалар техникадан тапшылық көріп отырған жоқ. Техника жеткілікті. Астық жинайтын 126 комбайн бар. Оның үшеуі картоп, 21-қант қызылшасын, 122-сі астық жинауға негізделген. Айтпақшы, ауданда биыл 85 шаруашылық тәтті түбір еккен. Шамамен 1,9 мың гектар қызылша алқабында да жиын-терін жұмыстары басталған. Аудандық сала мамандарының сөзіне сенсек, 200 гектарға жуық алқаптан өнім жиналған. Шамамен, жиылған 10,7 мың тонна тәтті түбірдің 9 мың тоннаға жуығы Көксу қант зауытына өткізілген. Айта кететін жайт, аудан шаруалары әр гектарына 570 центнерден өнім алуда.
– Мемлекет тарапынан жасалған қолдаудың нәтижесінде шаруалар келер жылы 2,5 мың гектарға тәтті түбір егуге ниетті. Биыл егін жинау науқанында диқандар еш алаңдаусыз еңбек етуде. Күзгі дала жұмыстарына шаруалар 585,6 тонна жанар-жағармайға өтінім берді. Ауыл шаруашылық тауар өндірушілерге 1 литр жанармай 255 теңгеден ұсынылуда. Күзгі жиын-терінге шаруалардың өтінімі 95 пайыз қанағаттандырылды, – дейді Қанат Сатығұлов.
Жоғарыда айтқанымыздай, ауа райы шаруаларға болысып тұр. Бас- тысы, жаз бойы төккен тердің өтеуі болар түйір дәнді шашау шығармай қамбаға құюға жазсын.
Дастанбек САДЫҚ
