Қазақстанда әлеуметтік маңызы бар азық-түлік тауарлары қымбаттап келеді. Ұлттық статистика бюросының дерегінше, соңғы бір жылда баға орта есеппен 9,7%-ға өскен. Алайда әр өңірде қымбатшылық деңгейі әртүрлі, кейбір қалаларда өсім елдік орташа көрсеткіштен екі есе жоғары.
Жезқазған – күнбағыс майы мен қырыққабат бағасы бойынша көш бастап тұр. Майдың литрі – 928 теңге (бір жылда 41% өсім), қырыққабаттың келісі – 234 теңге (34,5% қымбаттаған). Елдегі орташа баға – 163 теңге.
Алматы – тұз бен нан бағасы бойынша рекорд жаңартты. Тұздың килограммы – 109 теңге (ел бойынша 84 теңге), бір жылда 36,3% өскен. Арнайы әлеуметтік нан 56%-ға қымбаттап, килограммы 273 теңгеге жетті. Бұл – жарты нан шамамен 135 теңге деген сөз.
Семей – пияз ең қымбат қала болып отыр. Бір килограммы – 186 теңге, бір жылда 40,9% өскен. Ел бойынша орташа баға – 141 теңге.
Көкшетау – сиыр етінің бағасы ең жоғары өңір. Жауырын мен төс бөлігінің килограммы – 3 469 теңге, ел бойынша орташа баға – 3 176 теңге. Өсім – 29,1%.
Барлық өнімдер бірдей қымбаттаған жоқ, кейбір тауарлар арзандаған. Дегенмен, жалпы тенденция – бағаның өсуі. Бұл әсіресе ірі, экономикалық белсенді қалаларда айқын байқалады.
