Ауыл шаруашылығы министрлігінің мәліметінше, елде сиыр еті тапшылығы жоқ, экспортқа толық тыйым салынбаған. Қолданыстағы келісімшарттар бойынша сыртқы жеткізілімдер квота шеңберінде жалғасуда.
Ресми дерекке сәйкес, республикада ірі қара мал басы 8,7 млн-ға жетіп, оның ішінде 4,5 млн сиыр тіркелген. Бұл өткен жылмен салыстырғанда 3,1%-ға артық. Төл алу көлемі 2,7 млн бұзауды құрап, 17,9%-ға өскен. Мұндай көрсеткіштер өндірісті әрі қарай арттыруға негіз болмақ.
1 тамыздан бастап бордақылауға арналған мал сатып алуға жеңілдетілген несие беру бағдарламасы іске қосылды. Сондай-ақ бордақылау алаңдары мен ет комбинаттарына тапсырылған әр килограмм ірі қара үшін субсидия мөлшері 300 теңгеге дейін көтерілді. Бұл қадам өндірістің өсіміне қосымша серпін береді.
Министрлік австралиялық технологияларды қолдану арқылы ет кластерлерін дамытуға ерекше назар аударып отыр.
Аталған шаралар Қазақстанды ішкі нарықта сапалы сиыр етімен тұрақты қамтамасыз етіп қана қоймай, халықаралық нарықтағы бәсекеге қабілеттілігін сақтауға мүмкіндік береді.
