Елімізде халық денсаулығын қорғау мақсатында тегін скринингтер ұйымдастырылуда.
Скрининг не үшін қажет?
Скрининг – ауру белгілері шықпай тұрып ағзаны алдын ала тексеру. Негізгі мақсаты – қатерлі ісік, жүрек-қан тамырлары, қант диабеті сияқты кең таралған ауруларды ерте анықтап, уақытылы емдеу.
Қалай және қашан өтуге болады?
Скрининг «Халық денсаулығы және денсаулық сақтау жүйесі туралы» Кодекспен реттеледі. Заңға сәйкес, Қазақстан азаматтары профилактикалық медициналық тексерулерден өтуге міндетті.
Ол тек ауру белгілері бар адамдарға ғана емес, өзін сау сезінетіндерге де қажет. Барлық процедуралар тегін жасалады. Бұған дейін онкоскрининг тек МӘМС аясында қолжетімді болса, 2025 жылдан бастап кепілдендірілген тегін медициналық көмек пакетіне енгізілді. Енді сақтандыру мәртебесіне қарамастан кез келген азамат өте алады.
Қай жаста тексеруден өту керек?
-
Артериялық гипертония, жүрек ишемиясы – 40–76 жас;
-
Қант диабеті – 40–76 жас;
-
Глаукома – 40–76 жас;
-
Сүт безі қатерлі ісігі – әйелдер 40–76 жас;
-
Жатыр мойны қатерлі ісігі – әйелдер 30–74 жас;
-
Тоқ ішек қатерлі ісігі – 50–76 жас;
-
В және С вирустық гепатиті – белгілі жас топтарына.
Неге кейінге қалдыруға болмайды?
Көптеген аурулар алғашқы кезеңде еш белгісіз дамиды. Скрининг оларды ерте анықтап, тиімді емдеуге мүмкіндік береді.
«Уақтылы тексеру өлім-жітімді азайтып, өмір сүру ұзақтығын арттырады. Егер ауытқулар табылса, қосымша тексеру немесе маманның кеңесі тағайындалады. Диагноз расталса, ем жүргізіледі. Денсаулығыңыз жақсы болса, қорытынды мен алдын алу бойынша кеңес аласыз. Скрининг – аурудың алдын алудың ең тиімді жолы. Бұл – сіздің құқығыңыз әрі болашағыңызға қосқан үлесіңіз», – дейді Ұлттық ғылыми денсаулық сақтауды дамыту орталығының бас маманы Жадыра Айнекова.
Дереккөз: BAQ.KZ
