Алматы облысында 28 жастағы ер адамды өлтірді деген күдікпен халық емшісі қамауға алынды. Бұл туралы облыстық полиция департаментінің баспасөз қызметі хабарлады.
Өз үйінде тұрғылықты азаматтың мезгілсіз көз жұмуына байланысты ақпарат Қарасай ауданында тіркелген. Сот-медициналық тексеру нәтижесінде мәйіттен кеуде қуысының тұйық жарақаты, қабырғаларының сынуы және өкпе зақымы анықталды. Жәбірленушіге түрлі ауыр дене жарақатын салу барысында оның өліміне әкелуге қатысы бар деген күдікпен полицейлер халық емшісінің үстінен қылмыстық іс қозғады.
«Полицияға қайтыс болған азаматтың туыстарынан әлі күнге арыз түскен жоқ. Алайда бұл факт бойынша ҚР Қылмыстық кодексінің 106-бабы, 3-тармағына сәйкес сотқа дейінгі тергеу амалдары жүргізілуде. Қылмыстық істе күдікті ретінде дәстүрлі емес медицина қызметімен айналысатын 63 жастағы ер адам айыпталуда», — дейді құзырлы мекеме өкілдері.
Халық емшісіне жәбірленушіні оның туыстары алып келген. Олардың пікірі бойынша, жас азаматқа жын кірген. Соңғы үш жыл ішінде жігіт жын әсерінен қиындық көрген. Халық емшісі жын кірген жігітке бес күн ішінде түрлі әдістерді қолдану арқылы ем-дом жасамақ болған. Жас азамат жынды шығару салдарынан көз жұмуы мүмкін. «Бұл іс Қарасай ауданы полициясының өндірісінде. Күдікті уақытша қамауға алынды», — дейді облыстық полицияның баспасөз қызметі.
«ЖЕТІСУ-АҚПАРАТ»
