Облыс орталығындағы «Жетісу» стадионында өткен теңбіл доп тебу бәсекесі Талдықорғанның Қала күні мерекесіне орай ұйымдастырылған. Шараның басты мақсаты – салауатты өмір салтын ұстануды кеңінен насихаттап, ұрпақтар сабақтастығын нығайту және бұқаралық спортты дамыту.
Жарысты бастау салтанатында сөз алған әкімі Ернат Бәзіл жиналған жұртты алда келе жатқан Қала күнімен құттықтап, ойынға қатысушы ардагер спортшыларға айрықша алғыс білдірді.
Қалалық спорт бөлімі басшысы Жаннұр Әбішевтің айтуынша, шаһар басшысы Ернат Дүйсенбекұлының өзі бас болып алғашқы голды соққан бұл сайысқа оның орынбасарлары, аппарат жетекшісі және басқа да бөлім басшылары мен сала ардагерлері қатысқан. Сонымен бірге елімізге танымал футболшы, ұлттық құрама сапында рекордтық 76 мәрте ойын өткізген, Қазақстанның бірнеше дүркін үздік футболшысы Самат Смақов та бар. Тартымды да тартысты өтіп көрермен қауымның делебесін қоздырған ойын қортыныдысы 4:4 есебімен тең аяқталды.
– Бүгінгі шара футбол арқылы жастарға үлгі көрсетіп, салауатты өмір салтын дәріптеудің бір жарқын үлгісі болды. Осындай игі бастамалар бұдан былай да жалғасын таба береді деген сенімдемін. Алда келе жатқан шаһар тойы құтты болсын,– деді «Жетісу» құрама командасының бас бапкері Самат Смақов.
Шара барысында ардагерлер және қаладағы мектеп оқушылары мен жас футболшыларға 500 дана доп тарту етілді.
Айдын КӘЛІМХАН
