Күз басталысымен «Jetisý» газетінің тілшілері ел аралап, халық арасындағы жаңалықтарды өз көзімен көріп, аудан-қалалардың әлеуметтік-экономикалық даму деңгейіне көз жеткізіп қайтатын әдеті. Осы дәстүрмен редакция тілшілері бұл жолы Сарқан ауданына ат басын бұрды. Аграрлы және туризмнің негізгі көзі болатын шұрайлы өңірдің тыныс-тіршілігіне көз жеткізу мақсатында ең бірінші аудан әкімі Ғалымжан Маманбаевпен жолығып, шағын сұхбат құрған едік. Осыған назар аударыңыз, оқырман.
– Ғалымжан Қанатұлы, ең бірінші сауалымызды Мемлекет басшысы Қасым-Жомарт Тоқаевтың биылғы Жолдауында тапсырылған 7 бағыттан бастасақ дейміз. Жолдауда өңірлерге инвестиция тартуды қадап айтты. Осы бағыт ауданда қалай жүзеге асуда?
– Иә, инвестиция – өңір дамуының негізгі капиталы. Биылғы жылдық жоспар бойынша 51 млрд. теңге. Айталық, өткен жылы облыс бойынша инвестицияны көп тартқан аудан Сарқан. Мәселен, 73 млрд. теңге көлемінде инвестиция келсе, соның 80 пайызы жеке инвесторлар. Биыл да 10 айдың көрсеткіші бойынша негізгі капиталға тартылған инвестициялар 24 млрд. 99 млн. теңгені құрады, нақты көлем индексі 77,2%. Жыл әлі аяқталған жоқ. Жеке инвестор есебінен 40 млрд. теңгені құрайтын ең үлкен жоба – «Екіаша» су қоймасы. Қазіргі таңда жобаның өзгеруіне байланысты жұмысы кешеуілдеп тұр. Жыл аяғына дейін алғашқы кезеңін іске қосады. «Екіаша» су қоймасы толығымен 2028 жылы аяқталмақ. Барлығы іске қосылған кезде Сарқан ауданының 11 мың гектар жеріне су жетеді. Бұдан басқа, шағын инвестицияларымыз бар. Бір сөзбен айтқанда жыл аяғына дейін жоспарды орындаймыз.
– Ауданда өндіріс саласында қандай жаңалықтар бар? Өндіріс ошақтары ашылды ма?
– Сұрағыңыз орынды. Бізде ең ірі өндіріс орнының бірі – сүт өнімдерін өңдейтін зауыт. Одан бөлек, өзіңіз білесіз, өткен жылы сізбен сұхбаттасқан кезде жүгері кептіру цехын ашамыз деп уәде еткем. Бұл жұмыстар атқарылды. Ресей және Қытай елінен жүгері мен бұршақты кептіруге арналған автоматты қондырғы қойдық. Олар қыс бойы жұмыс істеп, шаруашылардың өнімдерін кептіріп, халыққа қалтқысыз қызмет етті. Бірақ биылғы көктемнен бастап жұмысын уақытша тоқтатып тұр. Оның да себебі бар, шаруалар жүгерінің тұқымын өзгертіп, ылғалдылығы аз болатын тұқымды сепкен. Алдағы уақытта ол өндіріс орындары басқа бағытқа ауысуы мүмкін. Бұдан бөлек, күнбағыс майын шығаратын және соя өңдейтін зауытымыз бар. Өнімдеріне сұраныс өте көп. Ауданға үлкен кіріс әкеліп отырған осы ірі өндіріс орындары. Ұсақ өндірістер де шетінен ашылып жатыр, олардың да өңірге қосқан үлесі көп және аудан тұрғындарын жұмыспен қамтып отыр.
– Экономиканың негізгі салаларының бірі – туризм. Сіз басқарып отырған аймақтың туризмді дамытуға әлеуеті зор. Осы жұмыстарға тоқталсаңыз?
– Шындығында Сарқан ауданы туризмнің қайнар көзі десек артық айтпаймыз. Тауымен де, суымен де мақтана алады. Ең бірінші – Балқаш көліне келейік. Бүгінде жолы толықтай бітті. Енді демалушыларға қолайлы жағдай туғызу мақсатында үлкен жұмыстарды атқарып жатырмыз. Дәл қазіргі уақытта Алматы қаласындағы жобалаушылармен бірлесіп көл жағасына мемлекеттік үш коммуналдық жағажай салуды жоспарлап отырмыз. Жобамызды облыс әкімі қолдады, келесі жылдың бюджетіне ақша бөлетін болды. Ол жерде ең бірінші автотұрақ, Арбат, екі шетіне тамақтанатын орындар және әкімшілік ғимараты бой көтермек. Одан да бөлек, демалуға келгендерге көңілді кеш сыйлау мақсатында амфитеатр, би кешін өткізу алаңы секілді және қауіпсіздікті сақтау мақсатында құтқарушылар мен полиция жұмыс істейді. Міне, Балқаштың жағасы кезең-кезеңімен осылай дами бермек. Енді бізде таулы аймақ өте көп. Біз тағы да Жасылкөлімізбен мақтана аламыз. Қазір оған баратын жолдың жиырма шақырымын дайындап қойдық. Келесі жылы ағыны қатты өзеніне көпір салып, көліктер Жасылкөлдің жағасына дейін жетуге мүмкіндік туғызамыз. Тополевка ауылында «Visit орталығы» ашылған. Орталықта сегіз бағыт белгіленген, келген адам өзіне керекті бағытты таңдап, табиғаттың таңғажайыбын тамашалап қайтады. «Жаныңызға сая іздегіңіз келсе Сарқанға келіңіз!» деп айтар едім. Өйткені нағыз туризмнің отаны – саялы Сарқан.
– Енді руханиятқа ауысайық. Баспасөзге деген көзқарасыңыз қандай? Сіз газет оқисыз ба?
– Біз жастайымыздан газетпен көз ашқан ұрпақпыз. Оны сенімді түрде айта аламын. Республика, облыс, аудандағы болып жатқан жаңалықты газет бетінен оқығанды ұнатамын. Онда толық және нақты деректермен беріледі. Тіпті халықпен кездесуімде үнемі тұрғындарды әлеуметтік желідегі жалған ақпаратқа емес, газеттердегі мақалаға сенуге шақырамын. Жалпы аудандағы қызметкерлерден бастап қарапайым тұрғындарға дейін бес газетке міндетті түрде жазылу керек. Олар: «Egemen Qazaqstan», «Казахстанская правда», «Jetisý», «Вестник Жетісу» және аудандық «Сарқан» газеті. Міне, осы бес газет те жұмыс үстелімде міндетті түрде тұрады.
– Сұхбатыңызға рахмет!
Сұхбаттасқан Ришад Тұрғанбай
