2018 жылғы 6 ақпанда Falcon Heavy зымыраны алғаш рет көкке көтеріліп, өзімен бірге ерекше жүкті – «Стармен» есімді манекен тізгіндеген Tesla Roadster электромобилін ғарышқа алып ұшқан болатын. Содан бері тура сегіз жыл өтті, – деп хабарлайды 7-su.kz ақпараттық порталы Tengri Auto сайтына сілтеме жасап.
«Where is Roadster» порталының соңғы деректеріне сүйенсек, Tesla қазір Жерден шамамен 303 952 082 шақырым қашықтықта жүр. Қазіргі уақытта көлік біздің планетамызға қарай сағатына 9 725 шақырым (немесе секундына 2,7 шақырым) жылдамдықпен жақындап келеді.
Ал Марс планетасына дейінгі қашықтық 188 757 578 шақырымды құрайды. Қызыл планетадан көлік, керісінше, сағатына 16 303 шақырым жылдамдықпен алыстап барады. Күннен қашықтығы 210 089 281 шақырымға тең.
Сегіз жылдық саяхат ішінде Tesla Roadster стандартты 58 000 шақырымдық кепілдік жүрісінен (пробег) 111 мың есе асып түсті. Көліктің Күнді айнала жүріп өткен жалпы қашықтығы 6,47 млрд шақырымға жетті.
-
Орбитадағы орташа жылдамдығы: сағатына 87 856 шақырым;
-
Күнді толық айналып шығу уақыты: 557 күн;
-
Осы уақытқа дейін жасаған айналымы: 5 мәртеден астам.
Бұл көрсеткіш Tesla-ны әлемдегі ең үлкен «пробегі» бар автомобиль ретінде тарихқа қалдырды. Оның жүріп өткен жолы жер бетіндегі барлық жолдарды 100 рет шарлап шығуға жетеді.
Зымыран ұшырылған сәтте көлік ішінде Дэвид Боуидің әйгілі «Space Oddity» әні шырқалып тұрған еді. Илон Масктің айтуынша, бұл туынды ғарышты игеру символизміне байланысты таңдалған. Егер көліктің аудиожүйесі мен батареясы әлі де істеп тұр десек, Стармен бұл әнді осы уақытқа дейін 793 мың рет тыңдап үлгерген болар еді.
Ғарыштағы электромобильді қарапайым көзбен немесе әуесқой телескоппен көру мүмкін емес. Оны анық байқау үшін диаметрі 13,6 метр болатын қуатты телескоп қажет. Қазіргі таңда әлемдегі ең үлкен Қытайдың FAST телескопы (диаметрі 500 метр) ғана Tesla-ны ғарыш тереңдігінен тауып, бақылай алатын қауқарға ие.
Илон Масктің бұл қадамы кезінде жарнамалық трюк ретінде бағаланса да, бүгінде ол адамзаттың ғарышты игеруге деген құштарлығының ерекше белгісіне айналды.
