Біріккен Ұлттар Ұйымы Бас хатшысы Антониу Гутерриштің Қазақстанға жасаған сапары, әсіресе, БҰҰ Бас Ассамблеясының 80-ші сессиясы алдындағы тығыз кестесінде жүзеге асуы – елімізге көрсетілген ерекше ықыластың белгісі. Бұл туралы сарапшы Дәурен Сейітжанұлы пікір білдірді.
«Антониу Гутерриш “Қазақстан – бейбітшілік пен диалог символы, халықтар арасындағы алтын көпір әрі көптеген жағдайда әділ мәмілегер екенін көрсетіп келеді” деді. Бұл – тек дипломатиялық сыпайылық емес, Қазақстанның халықаралық беделіне берілген шынайы баға», – деді сарапшы.
Оның айтуынша, Гутерриш мырзаның Алматыға сапары – еліміздің бейбітшілік пен орнықты даму жолындағы еңбегіне берілген халықаралық құрмет.
Сапардың тарихи мәні
Бұл кездесу Орталық Азиядағы тұңғыш “Тұрақты даму мақсаттары” өңірлік орталығының ашылуымен тұспа-тұс келіп, тарихи мәнге ие болды.
Сарапшының сөзінше, БҰҰ-ның өзі де бейбіт бастаманың символы ретінде дүниеге келген ұйым. Оның атауын алғаш ұсынған – АҚШ Президенті Франклин Делано Рузвельт. 1942 жылы 1 қаңтарда фашизмге қарсы бірігуге уәде берген 26 мемлекет алғаш рет бұл атауды ресми түрде қолданған. Ал 1945 жылы Сан-Францискода өткен кездесуде БҰҰ Жарғысы қабылданып, оған 50 мемлекет қол қойды.
Бүгінде БҰҰ — адамзат тарихындағы ең ауқымды әрі жаһандық жауапкершілікке ие ұйым ретінде қауіпсіздік, даму және адам құқықтары салаларында қызмет етеді.
Қазақстан – сенімді серіктес
Сейітжанұлының айтуынша, Қазақстан осы жаһандық миссияда өзін сенімді серіктес ретінде бірнеше мәрте дәлелдеді.
Мысалы:
– ядролық қарудан өз еркімен бас тарту;
– Сирия мәселесі бойынша Астана процесін ұйымдастыру;
– гуманитарлық көмек жобаларына қатысу –
бұлардың бәрі Қазақстанның жаһандық диалогтағы жауапкершілігін көрсетеді.
Президент Тоқаевтың бағасы
Мемлекет басшысы Қасым-Жомарт Тоқаев БҰҰ Бас хатшысына ризашылығын білдіре отырып, былай деді:
«Сіздің дер кезінде қолға алған әрі келешекті ойлаған UN80 бастамаңызды жоғары бағалаймын. Қазақстан ұйымды реформалау жолындағы іс-әрекеттеріңізді толық қолдайды. Осы ретте еліміздің Ұйым қызметінің негізінде жатқан мультилатерализм, дипломатия және ынтымақтастық қағидаттарына әрдайым бейіл екенін тағы да растаймын».
Сарапшы пікірінше, бұл сөздер Қазақстанның сыртқы саясаттағы ұстанымынан да терең – тарихи миссиясының көрінісі.
«Қазақстан үшін бейбітшілік – декларация емес, жол. Ал сол жолда алтын көпір болу – мәртебе ғана емес, үлкен жауапкершілік», – деп түйіндеді Дәурен Сейітжанұлы.
