Қаратал ауданының көркейіп, жылдан-жылға гүлденуі ауылдық округтерде салынып жатқан құрылыс нысандарының сәулетті болып бой көтеруіне тікелей байланысты. Бұл бағытта аудан көлемінде ауқымды жұмыстар атқарылуда.
Мәселен Қаражиде ауылында көптен бері халық сұранысында жүрген фельдшерлік-акушерлік пункт салынуда. Болашақта фельдшерлік-акушерлік пунктінің ауыл тұрғындарына тигізер пайдасы орасан зор екені белгілі. Өйткені бұл денсаулық орталығы осы ауылдағы басы ауырып, балтыры сыздаған ауыл тұрғындарының сырқатынан айығуына себеп болмақ.
Фельдшерлік-акушерлік пункттің құрылысын «БМ-К сервис» ЖШС жүргізуде. Әзірге мұнда 6 адам жұмыс істеп жүр.
– Құрылыс жабдықтары барлығы бар. Кірпішті Алматыдан алдырдық. Келесі жылы құрылыс нысанын сапалы әрі уақытылы аяқтаймыз, – дейді құрылыс алаңының басшысы Байтілеу Қадірбек.
Сондай-ақ ауылда 3 тұрғын үй салынуда. Тамыз айында басталған құрылыс жұмыстары аяқталуға жақын. 70 шаршы метрден тұратын баспана тұрмысы төмен отбасыларға беріледі. Бүгінде құрылыс алаңында 8 адам жұмыс істеп жүр.
– Үйді газаблоктан салып жатырмыз. 16-желтоқсанға дейін құрылыс жұмыстары толық аяқталады. Қазір үш үйдің де ішкі жұмыстар ғана қалды, – дейді құрылысшы Базархан Шыңғыс.
Бүгінгі таңда үйлердің шатыры толық жабылып, терезелері орнатылып, ауласы қоршалған. Ендігі кезекте құм сылақ жүргізу, есіктерді орнату жұмыстары қалған.
Айдар Қалиев
Суретті түсірген Серік Қантай
