Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің кезекті отырысында бизнестегі бес проблемалық мәселе қаралды.
Кәсіпкерлер өтінішінде кәсіпкерлік қызметтегі бірнеше сала қамтылды. Мәселен Жоңғар Алатауының таулы бөлігінде орналасқан «Ахласов» шаруа қожалығы Кербұлақ ауданындағы «Жайлау» орман жайылымында малға жабайы аңдардың шабуыл жасау фактілеріне назар аударды. Статистика мәліметі бойынша 2024 жылы 20-дан аса осындай жағдайды тіркелген, ал биыл олардың саны 30-ға дейін жеткен.
«Ахласов» шаруа қожалығының мәлімдемесінде: «Бизнес тек материалдық шығынға ұшырамайды. Жабайы жануарлардың шабуылдары ферма қызметкерлерінің өмірі мен денсаулығына да қауіп төндіреді. Жағдай тереңдей түсуде. Өйткені Қызыл кітапқа енгізілген Тянь-Шань ақ тырнақты аюы мен қар барысы сияқты жыртқыштар мемлекет қорғауында», делінген. Сонымен бірге, ҚР Конституциясына сәйкес адам, оның өмірі, денсаулығы ең жоғары құндылық болып табылады. Бұған қоса елдің негізгі заңы азаматтардың жеке меншігін қорғауға кепілдік береді.
Кеңесте облыстық орман шаруашылығы және жануарлар дүниесі инспекциясына жабайы жануарлардың шабуыл жасау фактілері бойынша статистика ұсынуды, облыстық әкімдік – ведомствоаралық зоологиялық комиссия құру мәселесін қарау ұсынылды. Мейрамхана бизнесі мен қоғамдық тамақтану саласындағы қызметті жүзеге асыратын бизнес субъектілерінің ұжымдық өтінішінде «Тұтынушылардың құқықтарын қорғау туралы» Заңындағы (8-1-бап) өзгерістерге назар аударылған, соған сәйкес келушілермен мекемелерге өз өнімдері мен сусындарын әкелуге рұқсат етіледі.
Осыған байланысты кәсіпкерлер: «Бұл ретте кәсіпкерлер санитарлық қауіпсіздікті қамтамасыз етуге және ықтимал салдары бойынша жауапкершілікте болуға міндетті», – дейді. Сондай-ақ, олар егер тамақ сырттан әкелінсе, қандай жауапкершілік туралы сөз болатынын түсінбей, тиісінше, бөтен өнімнің сапасына кепілдік бере алмайтындарын жеткізді.
Ұжымдық өтініште тамақтанушылар мен осы мекемелердің иелері арасындағы құқықтық қатынастарды реттейтін заңнамаға түзетулер енгізу бойынша ұсыныстар да болды. Бизнес субъектілерінің өтініші құқықтық баға беру үшін облыстық прокуратураға жолданды. Өңірлік кәсіпкерлер палатасына талқыланған мәселені «Атамекен» ҰКП проблемалық мәселелер тізіліміне енгізу ұсынылды.
Кеңес отырысында қаралған кәсіпкерлердің басқа да өтініштері аумақтық мемлекеттік кірістер органының әрекеттері мен бизнес субъектісіне айыппұл салу туралы сот шешімімен келіспеу, тендерге қатысу кезінде кәсіпкердің құқықтарына қысым жасау сияқты жеке сипаттағы мәселелерге қатысты болды. Барлық өтініш өтініш берушілердің қатысуымен талқыланып, уәкілетті органдардың атына тиісті ұсыныстар жіберілді.
Айгүл БАЙБОСЫНОВА
