Қазақстанда алаяқтардың жаңа айласы көбейіп барады. Олар кәсіпкерлерге Kaspi Pay аккаунтын “жалға беруді” ұсынып, жеңіл табысқа уәде етеді. Бірақ іс жүзінде бұл ұсыныс қылмыстық жауапкершілікке әкелуі мүмкін.
Мәселе неде?
Алаяқтар әлеуметтік желілерде хабарландыру жариялап, Kaspi Pay-ы бар кәсіпкерлерге “аккаунтты уақытша пайдалануға” рұқсат сұрайды. Оның орнына салықты толық төлеп, қосымша табыс түсетінін айтады.
Олар Kaspi Pay-ды не үшін пайдаланады?
- Алаяқтар сіздің атыңыздан маркетплейстерде арзан тауар карталарын шығарады.
- Сатып алушылар ақша жібереді, бірақ тауарды ешқашан алмайды.
- Нәтижесінде бүкіл алаяқтық операция сіздің Kaspi Pay арқылы жасалған болып шығады.
Неге өз атынан ашпайды?
Себебі, жалған тауар сату – бірден әшкереленетін қылмыс. Өз аккаунттарын пайдаланса, полиция тез тауып алады. Сондықтан олар бөтен адамның атына тіркелген Kaspi Pay-ды қажет етеді.
Сізге қандай қауіп бар?
- Қарызға батуыңыз мүмкін. Сіздің атыңыздан ірі көлемде ақша айналымы жүріп, салық қарыздары жиналады.
- Қылмыстық жауапкершілікке тартыласыз. Сатып алушылар шағымданған кезде, барлығы сіздің аккаунтыңыз арқылы жасалғаны дәлел болады.
- “Мен білмедім” деген ақталу құтқармайды. Заңды білмеу жауапкершіліктен босатпайды.
Қалай сақтануға болады?
- Kaspi Pay немесе кез келген банк аккаунтыңызды ешкімге бермеңіз.
- “Жалға алуға” заңды себеп жоқ екенін есте сақтаңыз.
- Күмәнді ұсыныстарға сенбеңіз.
Kaspi.kz-тің ескертуі
Kaspi.kz пен Қаржы нарығын реттеу және дамыту агенттігі алаяқтарға қарсы арнайы науқан жүргізіп жатыр. Соның аясында Kaspi Pay-ды жалға беру схемасы туралы бейнеролик жарық көрді.
Жаңа түсіндірме видеолар әр екі апта сайын Kaspi.kz-тің ресми YouTube арнасында жарияланады.
«Жетісу-Ақпарат»
