Мемлекет басшысы Қасым-Жомарт Тоқаев өз Жолдауларында мүмкіндігі шектеулі жандардың өмір сапасын арттыру, олар үшін инклюзивті және қауіпсіз орта қалыптастыру мәселесіне үнемі баса назар аударып келеді. Бүгінде ел Президентінің тапсырмасына сай еліміздің барлық өңірлерінде кедергісіз кеңістік қалыптастыру бағытында нақты шаралар қабылданып, жүйелі жүзеге асырылуда.
Талдықорғанның Қала күні қарсаңында арнайы басқосу өткізген шаһар басшысы Ернат Бәзіл аймақтағы қолжетімді орта қалыптастыруға өз үлесін қосып келген қоғам белсенділерін, кәсіпкерлер мен меценаттарды қабылдап, сый-құрмет көрсетті. Шаһардағы салтанат сарайында өткен марапаттау рәсімінде олардың еңбегін ерекше бағалап, алғыс білдірді.
– Әрбір азаматтың қоғам өміріне толық әрі тең құқықты қатысуы — біздің басты мақсатымыз. Ерекше қажеттіліктері бар жандар үшін қолжетімді орта қалыптастыру тек мемлекеттің ғана емес, бүкіл қоғамның ортақ міндеті. Осындай жауапкершілікті сезіне отырып, қамқорлық танытқан әрбір жанға алғысым шексіз, – деді қала әкімі.
Мамандардың мәліметінше, бүгінде Талдықорған қаласында 5200-ден астам мүгедек азамат тіркелген. Сондай-ақ,126 мемлекеттік нысан бар. Оның 118-і мүмкіндігі шектеулі жандардың еркін кіріп шығуына толықтай бейімделген. Биыл мемлекеттік мекемелерді қолжетімділікпен қамтамасыз ету мақсатында 91 млн теңге бөлініп, тағы 18 мекеме жан-жақты жабдықталған. Бұдан бөлек, қала аумағындағы 56 жеке меншік кәсіпкерлік нысанының 36-сы кедергісіз орта талаптарына сай жөндеуден өткізілген. Осы бағыттағы жұмыстар жүйелі түрде жалғасуда.
Айдын КӘЛІМХАН
