Жетісу облысының көмір қоймаларына қатты отын кестеге сай жеткізіліп жатыр, – деп хабарлайды 7-su.kz ақпараттық порталы облыс әкімінің баспасөз қызметіне сілтеме жасап.
Қазіргі таңда аймаққа тәулігіне орташа есеппен 9 вагон көмір түседі. Жылдағы жылыту маусымына облыс халқының қажеттілігі 375 мың тоннаны құрайды. Облыстық энергетика және тұрғын үй-коммуналдық шаруашылық басқармасының мәліметінше, аймақта 46 көмір түйығы мен қойма бар. Қазіргі сәтте оларда 32 мың тонна қатты отын қоры сақталған.
Мамыр айынан бастап теміржол қатынасы арқылы 24 мың тонна отын тасымалданды. Көмірдің «Шұбаркөл» және «Қаражыра» маркалары жеткілікті мөлшерде түсуде. Маман Әділет Хасенов күзгі-қысқы айларда сұраныстың артуына және кезектердің алдын алуға байланысты тұрғындарды қамдануға шақырды. Қолайлы ауа райында көмір сатып алу тасымалдау мен жеткізудегі кедергілерді сейілтеді.
Жылыту маусымына дайындық аясында жылу және электрмен жабдықтау кәсіпорындары жөндеу жұмыстарын атқаруда. Маусым басталғанға дейін 2 турбина мен 15 қазандық жөнделеді. Сонымен қатар 10,4 км жылу желісі, 558 км электр желісі және 52 трансформаторлық қосалқы станция жаңартылады. Талдықорған қаласында ұлттық жоба аясында 4,9 км жылу желісін модернизациялау көзделген.
Облыс орталығының Оңтүстік-Батыс тұрғын ауданында қуаты 49 Гкал/сағ болатын кварталдық қазандық пен жылу желілерін салу жалғасуда. Нысанды аяқтау қазан айына белгіленген. Талдықорған мен Текелі қалаларында жеке инвестиция есебінен жалпы жылу қуаты 118 Гкал/сағ және электр қуаты 137 МВт болатын газтурбиналық станциялар іске қосылады.
Өңірдегі газдандыру деңгейі бүгінде 67,2% көрсеткішке жетті. Қазіргі уақытта Панфилов, Қаратал және Ескелді аудандарындағы 16 елді мекенді көгілдір отынмен қамту жұмыстары жүргізілуде. Жобалар жыл соңына дейін аяқталмақ. Нәтижесінде Жетісу облысындағы газдандырылған елді мекендер саны 126-ға жетіп, 500 мыңнан астам тұрғын табиғи газға қол жеткізеді. Қатты отын қорын ертерек қамдау – қысқы маусымдағы тұрмыстық жайлылықтың кепілі.
