Конституциялық реформа аясында Ата Заңның преамбуласын жаңғырту және оның мазмұнын заман талабына сай өзектендіру мәселесі Парламент Мәжілісінің депутаты Үнзила Шапақ тарапынан көтерілді, – деп хабарлайды 7-su.kz ақпараттық порталы.
Конституциялық комиссияның отырысында сөз алған депутат бұл өзгерістердің ел болашағы мен ұлттық бірегейлік үшін маңызы зор екенін атап өтті. Үнзила Шапақтың пікірінше, Конституция преамбуласын жаңарту жай ғана техникалық түзету емес, бұл – ұлттық мемлекеттілікті нығайтатын және елдің идеялық бағдарын айқындайтын шешуші қадам.
Депутат өз сөзінде Мемлекет басшысының преамбулада ұлттық құндылықтарды негізге алу туралы бастамасына тоқталып, Қазақстанның Ұлы даладағы тарихи мемлекеттердің мұрагері екенін нақты көрсету қажеттігін айтты. Оның пікірінше, Конституцияның кіріспе бөлімі елдің тарихи-мәдени болмысын танытатын моральдық іргетасқа айналуы тиіс. Үнзила Шапақ өз ұсынысында Қазақстанның біртұтас ұлт ретіндегі бейнесін нығайтуға, аумақтық тұтастық пен шекара мызғымастығына басымдық берді. Сонымен қатар, «Әділетті Қазақстан» идеясы мен «Заң мен тәртіп» қағидатын Ата Заң деңгейінде бекіту мемлекет дамуының жаңа философиясын қалыптастыратынын жеткізді.
Үнзила Шапақтың Конституциялық комиссия отырысында айтқан сөзі:
– Мемлекет басшысы да преамбулада ұлттық құндылықтарды негізге алу қажеттігін нақты атап өтті. Қазақ даласынан бастау алатын өркениет пен мемлекеттілік дәстүрінің сабақтастығын айқын көрсету, Қазақстанның Ұлы даладағы тарихи мемлекеттердің мұрагері екенін нақты бейнелеу маңызды екеніне ерекше мән берді. Сондықтан Конституциялық реформа аясында келіп түскен барлық ұсыныстарға үстірт емес, байыппен, терең көзқараспен қарау – ортақ міндетіміз.
Ендігі біз ұсынатын преамбула мәтінінде бірнеше іргелі бағыт айқын көрініс табуға тиіс. Ең әуелі, Қазақстан өзін біртұтас ұлт ретінде танытуы қажет. Бұл – ұлттық бірегейлікті күшейтетін, барша қазақстандықты ортақ мақсат пен жауапкершілікке ұйыстыратын басты ұстаным. Преамбулада мемлекеттің унитарлық сипаты, шекаралардың мызғымастығы мен аумақтық тұтастықты сақтау мәселесіне ерекше мән берілуге тиіс. Қазіргі геосаяси жағдайда бұл қағидаттар ел егемендігін нығайтатын шешуші факторлар болып саналады.
Бүгін біз Конституция туралы айтқанда тек билік пен құқықтық нормаларды ғана емес, ұлттың болашақ алдындағы жауапкершілігін де ойлауымыз керек. Сондықтан табиғатты аялау, экологиямызды сақтау идеясы Конституцияда қоғам мен мемлекеттің ортақ құндылығы ретінде көрініс табуға тиіс. Мәдениет, Әділетті Қазақстанның Конституциялық негізі мемлекеттілік – тек заңдар мен институттар арқылы ғана емес, ұлттық рух пен мәдениет арқылы орнығады. Сондықтан мәдениеттің және рухани құндылықтардың рөлі Конституцияда айқын көрініс табуға тиіс. Дәл осы мәдени негіз халықты біртұтас ұлтқа айналдырып, қоғамдық бірлікті нығайтады. Мәдениетті Конституциялық деңгейде бекіту арқылы біз Әділетті Қазақстанның тек құқықтық емес, өркениетті мемлекет екенін нақтылаймыз. Сонымен бірге мәдениет пен өнерге, ғылым мен білімге, инновацияға, табиғатты аялауға, бүгінгі және келер ұрпақ алдындағы жауапкершілікке мән берілуі Конституцияны тек құқықтық емес, өркениеттік құжат деңгейіне көтереді. Бұл – мемлекет пен халық арасындағы жария қоғамдық келісімнің айқын көрінісі, – деді ол.
