Қазақстан Республикасының Конституциясы – еліміздің ең басты құқықтық құжаты, мемлекетіміздің саяси, экономикалық және әлеуметтік жүйесінің негізін қалаған Ата Заң. 1995 жылы 30 тамызда бүкілхалықтық референдумда қабылданған бұл тарихи құжат еліміздің тәуелсіздігін нығайтып, демократиялық даму жолындағы басты бағдарымызға айналды.
Биыл Конституцияның қабылданғанына 30 жыл толып отыр. Бұл үш онжылдықта Ата Заңымыз уақыт талабына сай бірнеше рет жаңартылып, ел дамуының жаңа кезеңдеріне бейімделді.
Конституцияда адам құқықтары мен бостандықтары, азаматтардың теңдігі, заң үстемдігі, билік тармақтарының бөліну принциптері нақты бекітілген. Ол – мемлекеттің тұрақтылығы мен халықтың бірлігін қамтамасыз ететін басты кепіл. Осы жылдар ішінде елімізде саяси жүйені жетілдіру, экономиканы дамыту, әлеуметтік қорғау тетіктерін күшейту бағытында қабылданған барлық реформалар Конституцияға сүйеніп жүзеге асты.
Ата Заңымыздың 30 жылдығы – тек құқықтық құжаттың мерейтойы ғана емес, тәуелсіз Қазақстанның қалыптасу жолындағы маңызды белес. Бұл – өткен жолымызға көз жүгіртіп, жеткен жетістіктерімізді бағамдап, болашаққа сеніммен қадам басуға мүмкіндік беретін тарихи сәт. Конституцияда бекітілген құндылықтар мен қағидаттар біздің қоғамымыздың іргетасы болып қала береді, ал оны қастерлеу – әрбір қазақстандықтың борышы.
«Жетісу-Ақпарат»
