Крещение мерекесіне дайындық бойынша Жетісу облысының Төтенше жағдайлар департаменті, облыстық дін істері басқармасы және Православие шіркеуінің өкілдері тұрғындарға түсіндіру жұмыстарын жүргізуде. Бейсен Құранбек атындағы Журналистер үйінде «Крещение мерекесі кезіндегі қауіпсіздік шаралары туралы» баспасөз конференциясы өтті.
Жиынға облыстық ТЖД Төтенше жағдайларды жою басқармасының бастығы Қалдыбек Төлеуұлы, облыстық Дін істері басқармасының басшысы Сағыныш Жаңабай және Талдықорған қаласындағы Иоанн Богослов соборының діни қызметкері Александр Матлашов қатысты.
Қалдыбек Төлеуұлының мәлімдеуінше, 18-нен 19-на қараған түні облыс аумағында шомылу үшін ресми түрде 14 орын белгіленіп, жабдықталған.
Қауіпсіздікті қамтамасыз етуге 91 құтқарушы мен ТЖД қызметкері кезекшілікте болады. Тек ресми орындарда ғана құтқарушылар, медицина мамандары мен полиция қызметкерлері кезекшілік етеді. Сондықтан, жабдықталмаған жерлерде суға түсу өмірге өте қауіпті, – деді ол.
Қысқы шомылу кезінде жүрек-қан тамырлары, бүйрек аурулары бар, қан қысымы жоғары, қант диабетімен ауыратын жандарға және жүкті әйелдерге суға түсуге тыйым салынады. Суға түсер алдында алкогольдік ішімдік тұтынуға үзілді-кесілді жол берілмейді. Суға аш қарынға түспеген абзал (тамақтанғаннан кейін кемінде бір сағат өтуі тиіс). Сонымен қатар балаларды қараусыз қалдыруға болмайды.
Шіркеу тәжірибесінде сенушілер үшін Крещение кезінде суға түсу міндетті емес. Оның айтуынша, кейбір діни ұстаздар тіпті бұл үрдіске қарсы болған. Дұға мәтіндерінде де тек су бүрку немесе жағу туралы айтылады, ал суға толықтай сүңгу туралы талап жоқ. Сондықтан әрбір адам өз денсаулығына жауапкершілікпен қарауы тиіс, – деді Священник Александр Матлашов.
Дін істері басқармасының басшысы Сағыныш Жаңабай арнайы іс-шаралар жоспары бекітілгенін және ресми шомылу орындары жоқ аудандарда рейдтік жұмыстар жүргізілетінін атап өтті.
Мақпал Әділханқызы
