Көру қабілеті нашар, әлемді саусақ ұшымен танығандарға облыстық С. Сейфуллин атындағы орталық кітапханасының зағип және нашар көретін азаматтарға арналған бөлімі 20 жылдан аса қызмет етіп келеді.
Кітапхана мүмкіндігі шектеулі жандарды әртүрлі бағыт бойынша конференция, семинар, дөңгелек үстел ұйымдастыруда, оларды қажетті ақпаратты іздеуде және әлеуметтік-мәдени өмірінде өз қабілеттерін қолдануға мүмкіндік береді. Сондай-ақ зағиптар мен нашар көретіндер үшін кітапхана сұранысын қанағаттандырып, ақпарат пен электронды жүйеге тегін қол жеткізетін ортаға айналған.
Біздің бөлім 2016 жылдан бері Мәскеу қаласындағы «Логос» онлайн кітапханасының АВ-715 бағдарламасын қолдануда. Осы мүмкіншілікті қолдана отырып бөлім қызметкерлері аудандардағы зағип жандардың аудиокітапқа қол жеткізуіне тиімді жағдай жасап отыр.
Жетісу облысы бойынша 515 адам облыстық «Қазақ зағиптар қоғамына» тіркелсе, оның 373-і бөлім оқырманы саналады. Бөлімде 30490 кітап қоры және 4 кітапханашы қызмет көрсетеді. 2022 жылдан бастап «Кедергісіз болашақ» жобасы жүзеге асырылып, жоба аясында бөлім брайль қәріптеріннен тұратын әліппе, Jaws for windows дауыстап оқитын бағдарламасы бар дербес компьютер, тифлоқұрылғылар, тифломагнитафон, тифлофлешплеер, Clearreader, Sara-Se дауыстап оқитын құрылғылары және үлкейтіп көрсететін лупамен жабдықталған.
Сонымен қатар, дәл осы жоба аясында «Жігері жасымаған жандар» атты байқау дәстүрлі түрде өтіп келеді.
Бүгінде зағип жандардың мәдени өмірін қалыптастырып, кітапхананың ақпараттық қызметін пайдалануға мүмкіндік көп. Олардың заманауи өмірге үйренуі, тәжірибелік қызметте қажетті ақпаратты іздеу және қолдануына, әлеуметтік-мәдени бағытта өз мүмкіндіктерін жүзеге асыруына кітапханашылар айрықша қызмет ете бермек.
Гаухар Таукебаева,
С. Сейфуллин атындағы орталық кітапханасының
«Зағип және нашар көретін азаматтарға» арналған бөлімнің меңгерушісі
Фото: cultinfo.ru
