ҚР Президенті Қасым-Жомарт Тоқаевтың төрағалығымен өткен кеңес хаттамасының 4-тармағына сәйкес, криптология саласында кадрлар даярлаудың отандық жүйесін құру мақсатында арнайы жол картасы әзірленді. Осы құжат аясында Әл-Фараби атындағы Қазақ ұлттық университетінің Ақпараттық технологиялар факультетінде жаңа «Киберқауіпсіздік және криптология» кафедрасы құрылды. Бұл бастама ҚазҰУ КЕАҚ директорлар кеңесінің сырттай отырысында өткен жылдың шілде айында талқыланды.
Кафедраның басты мақсаты – ақпараттық қауіпсіздік саласында кәсіби мамандарды даярлау, сондай-ақ киберқауіпсіздік пен криптологияның заманауи талаптарына сәйкес білім мен дағдыларды игеру. Кафедра студенттерді ақпараттық жүйелер мен желілерді қорғау, шифрлау әдістері мен қауіпсіздік саясатын әзірлеу бойынша теориялық білім мен практикалық дағдылармен қаруландыруды көздейді. Сонымен қатар, ғылыми зерттеулер мен инновациялық жобаларға назар аудара отырып, ұлттық және халықаралық деңгейде киберқауіпсіздік саласындағы жаңа шешімдер мен технологияларды дамытуға ықпал етеді.
Криптология саласындағы білім беру бағдарламасын жаңғырту және жоғары білікті мамандар даярлап, жол картасының міндеттеріне сәйкес, киберқауіпсіздік және криптология пәндері бойынша ғылыми біліктілігі жоғары әрі практикалық тәжірибесі мол мамандарды жұмысқа тарту көзделіп отыр. ҚР Ұлттық Қауіпсіздік комитеті, Радиоэлектроника және байланыс әскери-инженерлік институты ұйымдарында жұмыс атқаратын қызметкерлер оқытушылық қызметіне шақырылып, шетел профессорлары да оқу-әдістемелік процестерге белсенді түрде қатысуға тартылды. Бұл шара Қазақстанның киберқауіпсіздік стратегиясын жүзеге асыруда маңызды рөл атқарып, мемлекеттік органдар мен жеке сектор арасында тиімді ынтымақтастықты нығайтады.
Жаңа кафедра аясында заманауи зертханалар ашылып, жетекші халықаралық ұйымдармен серіктестік орнатылып, ғылыми-зерттеу жобалары жүзеге асырылатын болады. Сонымен қатар, студенттер мен жас мамандарға арналған тағылымдамалар мен біліктілікті арттыру курстары өткізіліп, криптология саласындағы жаңа ғылыми әзірлемелер жасауға жағдай туындайды.
Алдағы уақытта кафедра түлектері мемлекеттік органдарда, ақпараттық технологиялар компанияларында, қаржы саласында және құқық қорғау құрылымдарында жұмыс істеп, елдің цифрлық қауіпсіздігін қамтамасыз етуде өз үлестерін қосады. Осылайша, «Киберқауіпсіздік және криптология» кафедрасы Қазақстанның цифрлық егемендігін нығайтуға және халықаралық деңгейдегі бәсекеге қабілетті мамандар даярлауға маңызды серпін береді.
С.М. НАРБАЕВА,
«Киберқауіпсіздік және криптология» кафедрасы меңгерушісінің оқу
және тәрбие ісі жөніндегі орынбасары
Ә.Т. ТУРАРБЕК
«Киберқауіпсіздік және криптология» кафедрасының PhD, доцент м.а.
Фото:wikipedia.org
