Жыл сайын қыркүйек айында шаhарымызда «Қала күні» мерекесі дәстүрлі түрде өтеді. Биыл Талдықорғанның қала мәртебесін алғанына 80 жыл толуымен тұспа-тұс келді. Мерейлі мерекеге орай түрлі іс-шара бір айға жалғасып, бүгін «Жастар» саябағында қорытынды шаралар болады.
Шара өтіп жатқан «Жастар» саябағынан 7-su.kz желілік басылымының тілшісі Серік Қантай фото-видеолармен бөлісіп,
қала күнінен барынша ақпаратты жедел беріп отырмақ.
11.00 — «Жастар» саябағына ағылған жұртта есеп жоқ. Сахна безендіріліп, салтанатты шара алдындағы соңғы дайындықтарын жүргізіп жатыр. Бүгінгі іс-шараның ресми ашылуы 12:00-ге жоспарланған.
12:00 — «Жастар» саябағында орналасқан ашық аспан астындағы сахнада ресми мерекенің ашылуы өтіп жатыр. Алғашқы болып «Оқушылар сарайының» қызметкерлері және сол мекеменің өнерлі өрендері шықты. Саябақтың әр жерінде түрлі ойындар ұйымдастырылып жатыр.
12:30 — «Жастар» саябағындағы негізгі алаңнан бөлек, спорт сарайынан бастап, Орталық бассейнге дейін балаларға арналған түрлі ойындар ұйымдастырылып, жәрмеңкелермен тұрғындарға арналған іс-шаралар болып жатыр.
13:20 — Ұлттық спорт түрлерінен де жарыстар басталды.
14:30 — Көп адамның арасынан Талдықорғанда жұмыс істеп жүрген Сербия азаматы Неманья Еремичті отбасымен бірге жүрген жерінен жолықтырдық. Оның қалаға келгеніне үш ай болған. Жетісудың ауа-райы ұнағанын, табиғаты тамаша екенін айтып, үйреніп қалғанын да жасырмады. Серб азаматы қала күнінде көптеген іс-шара ұйымдастырылып, балаға да, үлкенге де барлық жағдай қарастырылғанына риза.
15:30 — Бұл жердегі әуезді әндер, компазициялар таңнан бері жалғасып жатыр. Жанды дауыстағы орындаулармен түрлі аспаптың қосындысынан шыққан туындыларды тыңдаушылар да көп.
16:10 — Үлкен сахнадағы мерекеге арналған әндер мен билер, шоулар жалғасып жатыр. Талдықорғандықтардың бәрі осында десе де болады. Кешкісін болатын қорытынды концертте Say Mo, Kalifarniya сынды орындаушылар өнер көрсетеді.
16:20 — Талдықорғанның өткені мен бүгіні. Қала тарихынан сыр шертетін көрме ұйымдастырылған.
16:40 – Мерекелік шараның күндізгі бөлімі өз мәресіне жетті. Түрлі форматта ұйымдастырылған істерді келгендердің көңілінен шықты. Жиналғандар таңертеңнен Оқушылар сарайындағы өнерпаздардың, «Жалпы театардың» балаларға арналған қойылымын, «Умберто» музыкалық ұжымының шығармашылығын тамашалады. Балалар алаңында түрлі ойындар, батуттар, акваргим, сабын көпіршіктері, бояу қабырғасы болды. Ал ерескетерге дженга, шөп лабиринті, корнхоул, дойбы, фотокөрмелер ұйымдастырылды. Одан бөлек таңертеңнен кешке дейін әуе шарларын қызықтағандардың қатары да көп екенін көрдік. Енді мереке кешкілік бөлімге арналған әндермен билер, шоулармен жалғасады.
17:40 — Жиналғандар алдында қала әкімі Ернат Бәзіл шығып, сөз сөйледі. Өз құттықтауында шаһар басшысы «Қала күнімен» және әсем қаламыздың қала мәртебесін алғанына 80 жыл толуымен шын жүректен құттықтаймын! Бұл уақыт тарих үшін санаулы болғанымен, қала дамуы үшін маңызды кезең! Осы уақыт аралығында сүйікті шаһарымыз жылылыққа толы, сенімді түрде нық қадаммен дамып келеді» деді.
18:20 — «Жастар» саябағындағы қызықтар қайта жанданғандай. Аяқ алып жүру қиын. Адам көп. Мерекенің кешкілік әсері ерекше.
19:40 — Мерекелік кеш жоспар бойынша жүріп жатыр. Күздің салқын кешіне қарамастан «Жастар» саябағына жиналғандар көп. Жиналғандар 80 жұптың биін (вальс), «Умберто» тобының орындауындағы әлемдік хит әндерді тыңдап, барабаншылардың дайындаған шоуын көрді. Енді негізгі хедлайнерлер эстрада орындаушылары Say Mo, Kalifarniya-ның әндерін тыңдайды. Жоспар бойынша әрқайсысы жарты сағат өнер көрсетеді. Одан кейін мерекелік кешті отшашу түйіндейді.
