Атакәсіпті ардақтап, ел дәстүрін жалғастырған еңбеккерлерге арналған жарысты «Биязы және биязылау жүнді қой тұқымдарының» Республикалық палатасы, аудан әкімдігі, «Бақыт Қаратал» ЖШС-і ұйымдастырды.
Сайыстың ашылу салтанатында сөз алған Ауылшаруашылығы министрлігі мал шаруашылығы департаменті мал шаруашылығындағы асыл тұқымдық іс және норма шығармашылығы басқармасының басшысы Мұхит Омаров, «Биязы және биязылау жүнді қой тұқымдарының» республикалық палатасының атқарушы директоры Қайырлы Омашев игі шараның маңыздылығына тоқталып, қатысушыларға сәттілік тіледі.
Өз кезегінде жарыстың өтуіне мұрындық болған «Бақыт Қаратал» ЖШС-нің басшысы Серікжан Жексембиев:
– Өткенімізге үңілсек «Мал өсірсең қой өсір, өнімі оның көл-көсір» деп шопан ата таяғын ұстап, жаз жайлауда, қыс қыстауда төрт түлік малын жайған көшпендінің ұрпағымыз. Атакәсіпті дөңгелетіп отырған шопандардың еңбегі еленіп, мерейінің үстем болғаны кім-кімге де қуаныш. Сондықтан біз тарихымызды жаңғыртып, шопандардың мәртебесін өсіру, жел өтінде мал соңында жүрген жандардың еңбегін жастар біліп өссе деген мақсатта осы шараны ұйымдастырдық, – дей келе бұл үрдіс жылда жалғасатынын айтты.
Жарысқа республикамыздың әр өңірінен келген шопандар қатысты. Сайыс үш кезең бойынша өрбіді. Бірінші кезеңде қой шаруашылығындағы тест тапсырса, екінші кезеңде қозыларды енесімен табыстырды. Яғни, қатысушы 5 минут ішінде бөлінген бір қозыны алып, отар қойдың ішінен енесін табуы керек. Уақыт бойынша қозыны енесімен ерте табыстырған шопан жоғары балға ие болды. Үшінші кезең сұрақ-жауап форматында өтті. Мұнда қатысушылар қой өсірудің пайдасы мен бағудың қыр-сыры кеңінен талқыланды. Сонымен қатар шопан тапшылығы сынды өзекті мәселелер де айтылды.
Жайлаудан ырысын іздеген малшылардың сайысын тамашалауға сонау Түркия еліндегі Харран университетінен келген биохимик-формацевт Йылдырым Метин: «Маусым айында Алматы қаласында фармацевтика саласы бойынша өтетін конференцияға келген едім. Әріптестерім мені шопандар сайысын, ауылдың тыныс-тіршілігін көру мақсатында Жаңаталап ауылына шақырды. Түркияда көшіп-қонып мал бақпайды. Шопандардың ептілігін көріп, жарыстан керемет әсер алдым», – деді.
Сайыс қорытындысы бойынша 1-орынды еншілеген «Жасұлан» шаруа қожалығының шопаны Жасұлан Тасыбаевқа жылқы, тұғырдың екінші сатысынан көрінген «Тантыбай» шаруа қожалығының шопаны Амангелді Байғабылов ірі қара, үздік үштікті түйіндеген Жамбыл ауданынан келген «КТ Нұрымбай» шаруа қожалығының шопаны Болат Әпетаевқа қой берілді.
Соңында қатысушылар шопандарға қолдау жайлы өтініштері мен осындай игі шаралар жиі ұйымдастырылса деген тілектерін білдірді.
Айдар ҚАЛИЕВ
