Қазақстан Республикасы Парламенті Мәжілісінің депутаты, Қазақстан Халық партиясы фракциясының жетекшісі Магеррам Магеррамов Конституциялық реформа жөніндегі комиссияның 12-ші отырысында жаңа Конституция жобасының маңыздылығына тоқталды. Оның айтуынша, құжат өңірлерде кеңінен қолдау тапқан.
Депутат жаңа Конституция жобасында «Әділетті Қазақстан» қағидаты айқын көрініс тапқанын атап өтті.
«Қазақстан Республикасының жаңа Конституциясы жобасында алғаш рет Преамбула мен жалпы ережелер деңгейінде мемлекеттік дамудың іргелі бағдары ретінде “Әділетті Қазақстан” құндылығы белгіленді. Бұл – Қазақстан Халық партиясы толық қолдайтын әлеуметтік әділеттілік ұстанымы. Әділетті Қазақстан – “Заң мен Тәртіп” қағидатын бұлжытпай орындайтын, тең мүмкіндіктер мен кепілдендірілген құқықтар мен бостандықтарға негізделген ел», – деді ол.
Сонымен қатар, депутат тарихи сабақтастық пен ұлттық құндылықтардың сақталуына да ерекше назар аударды. Оның сөзінше, жаңа Конституцияның Преамбуласында қоғамдық бейбітшілік пен орнықты дамудың негізгі тірегі ретінде этносаралық және конфессияаралық келісімге айрықша мән берілген. Еңбек ету құқығы туралы норманың да қоғам тарапынан ерекше қолдау тапқаны айтылды.
Институционалдық өзгерістерге тоқталған Магеррамов мемлекеттік билік құрылымының жаңаруын атап өтті. Атап айтқанда, бір палаталы Парламент құру, «Халық кеңесі» атты жоғары консультативтік орган қалыптастыру және басқа да түбегейлі жаңашылдықтар мемлекеттің жаңа даму бағытын айқындайды. Депутаттың пікірінше, мемлекет енді тек процестерді басқаруға емес, азаматтарға қызмет көрсетуге бағытталуы тиіс.
Магеррам Магеррамов жаңа Конституция жобасының кеңінен қолдау тапқанын айтып, оны жалпыхалықтық референдумға шығаруды ұсынды.
«Қазақстандықтардың басым көпшілігі жаңа Конституция жобасын қолдайтынына сенімдімін. Бұл – Комиссия жұмысының ғана емес, еліміздің барлық өңірлерінде қоғамдық, әлеуметтік топтармен, қоғамдық ұйымдармен және еңбек ұжымдарымен өткен кездесулердің нәтижесі. Қазақстан Халық партиясының филиалдары осы бағытта ауқымды жұмыс жүргізді», – деді ол.
Сондай-ақ Мәжіліс депутаты партия фракциясының бастамасымен Парламент Мәжілісінде кеңейтілген отырыс өткенін хабарлады. Оған филиал өкілдері, сарапшылар, ғылыми және заң қоғамдастығының мүшелері, кәсіпкерлер мен үкіметтік емес ұйымдар қатысқан. Жиынға 100-ге жуық адам қатысып, жаңа Конституция жобасына бірауыздан қолдау білдірген.
«Жаңа Конституция жобасы – өткен кезеңнің тәжірибесін ескере отырып, Қазақстанның болашақ даму бағытын айқындаған халық бірлігі мен тұтастығының көрінісі. Осыған байланысты біз құжатты жалпыхалықтық референдумға шығаруды ұсынамыз», – деп түйіндеді Магеррам Магеррамов.
