Төрт түлікпен айналысатын шаруалар жылдың төрт мезгілінде тыным таппай еңбек ететіні белгілі. Қазақ халқының «Мал-жан аман ба?» деп амандық сұрасуы – мал шаруашылығының тіршіліктегі маңызын айқын көрсетеді.
Әсіресе қыс мезгілінде табиғи жайылым мүмкіндігі шектеліп, мал толығымен шаруашылықтағы дайын қорларға тәуелді болады. Сондықтан шөп, жем, сүрлем секілді азық түрлерін дер кезінде дайындау қыстан шығынсыз шығудың басты кепілі. Бұған қоса жылы қора, таза су және жүйелі бақылау жұмыстары да маңызды рөл атқарады.
Осындай жауапты науқан кезінде тынымсыз еңбек етіп жүрген шаруалардың бірі – Алмалы ауылындағы «Темірлан» шаруа қожалығының басшысы Қанат Малайбеков. Ол қысқа тыңғылықты дайындалып, жаз айларында 30-40 тонна арпа мен 400 тонна орама шөп дайындап қойған. Қысқы азық қоры жеткілікті шаруашылықта бүгінде мал қоңы қалыпты, күтім үзілмейді.
– «Темірлан» шаруа қожалығы 2004 жылы әкем Есімбектің бастамасымен құрылған. Бүгінде шаруашылықты өзім басқарып келемін. Тұрақты жұмысшылар жоқ, сондықтан барлық істі өзім ұйымдастырып, күнделікті қадағалап отырамын. Қыста мал қыстату, көктемде төл алу – жауапты әрі тынымсыз еңбек, – дейді Қанат Малайбеков.
Қазір қожалықта «Алатау» тұқымды 78 ірі қара, 30 бас жылқы, 600 қой және 200-ге жуық төл бар. Болашақта шаруашылық аумағынан 200 саулық қойға арналған жылы қора салу және мал басын көбейту жоспары бар.
Мал қыстату науқаны дұрыс ұйымдастырылған жағдайда ғана түлік басы сақталып қана қоймай, көктемгі төл алу көрсеткіші де жоғары болады.
Қорыта айтқанда, мал қыстату жай ғана маусымдық жұмыс емес, ол ауыл шаруашылығының тиімділігін арттыратын кешенді әрі жауапты үдеріс.
Жақсылық Игіман
