Балалар жан-жақты дамыған дұрыс азамат болып өсуі керек. Осы тұрғыда облыс әкім Бейбіт Исабаевтың идеясымен жүзеге асырылып жатқан «Әдеп және құқық жұмысы жөніндегі ментор» жобасы аясында құқық бұзушылықтың және бопсалаудың алдын алу мәселесі бойынша оқушыларға арнайы дәріс өткізілді. Сабақ-дәріске оқу орнының үлкен, кіші сыныптары қатысты.
Балалар бір-бірін қорқытуға, мәжбүрлеуге, бопсалауға, күш қолдануға, сөзбен қорлауға әсте болмайтынын ұғынып өсуі керек. Жаман әдеттерден бойларын аулақ ұстауға үнемі насихат жүргізіп отыру шарт. Жеткіншектермен жұмыс істеу барысында жаман әдеттің неге апарып ұрындыратынын үнемі түсіндіріп, әлеуметтік желілердегі тәрбиелік мәні бар бейнелерді көрсетіп отырамыз. Бұл өз кезегінде жақсы жағынан нәтижесін беретініне көзімізді жеткіздік.
«Тәрбие – талбесіктен», дейді дана қазақ. Осы тұста ата-аналардың да балаларымен жұмыс жасауы үлкен маңызға ие екенін айтып өткен жөн. Әкенің тәлімін бала бойына ешкім сіңіре алмасы ақиқат. Олай болса әке балаларын жамандықтан аулақ болуға шақырып отырғаны дұрыс. Сонда ғана өсіріп отырған ұл-қыз от басып арандап қалмайды.
Қазіргі кезде оқушылардың мінез-құлқы да үлкен өзгеріс үстінде екенін бажайлаймыз. Сол өзгеруді жақсы жаққа бұра білу оң қадам болмақ. Тағылымды, тәрбиелі тұлғалардың өмірінен мысалдар келтіріп отыру олардың ізгілікке бет бұруына ықпал етпек. Аталған жобаның да пайдасы осында.
Бала жаңа өсіп келе жатқан жас бұтақ іспеттес. Олардың тәрбиесіне қатысты кеңес беріп, адамгершілік мәнін ұғындырып қабілеттерін ұштай түсу маңызды. Әсіресе зорлық-зомбылықтан арашалау баршамызға артылған жүк.
Мұхит САРСЕБАЕВ,
«С. Мұратбеков атындағы № 9 орта мектепке дейінгі шағын орталығы бар» КММ менторы
Талдықорған қаласы
