Мәжіліс депутаты Мұрат Әбенов Конституциялық реформа жөніндегі комиссияның оныншы отырысында әлеуметтік желілерде тараған жалған ақпараттарға жауап берді. Ол Қазақстанның біртұтастығы мен құқықтық кеңістігінің қолсұғылмауын басты назарға алды, – деп хабарлайды 7-su.kz ақпараттық порталы.
Алатау қаласы – автономия емес
Қоғамда үлкен талқылау тудырған мәселенің бірі – Ата заң жобасының 5-бабындағы 6-тармақ. Желі қолданушылары арасында бұл норма «мемлекет ішіндегі мемлекет» құруға жол ашады деген қауіп айтылған болатын. Алайда Мұрат Әбенов бұл тезистің негізсіз екенін мәлімдеді.
«Бұл шындыққа жанаспайды. Қазақстан – бірыңғай құқықтық кеңістігі бар біртұтас мемлекет. Алатау – бұл автономия да, ерекше аумақ та емес. Бұл – біздің қазақстандық қала. Онда тек бизнеске жеделдетілген рәсімдер мен инвестиция тарту үшін қаржылық дербестік қарастырылған», – деді депутат.
Институционалдық дағдарыстан сақтану
Депутаттың айтуынша, жаңа Конституция жобасына саяси тұрақсыздықтың алдын алатын пәрменді құқықтық тетіктер енгізілген. Атап айтқанда, 46-шы және 62-баптарға қатысты «AMANAT» партиясы фракциясы маңызды түзетулер ұсынды. Енді Құрылтайды тарату Президенттің міндеті емес, тек «құқығы» ретінде қарастырылмақ. Бұл жүйені іштен шайқалтудан және жасанды саяси дағдарыстардан сақтайды.
Вице-Президент және «жою мәдениеті»
Реформадағы тағы бір жаңалық – Вице-Президент институтының енгізілуі. Мұрат Әбенов бұл қадамның халықаралық қоғамдастық үшін түсінікті модель екенін және Қазақстанның саяси салмағын арттыратынын атап өтті.
Сонымен қатар, депутат қазіргі қоғамда белең алған «жою мәдениетіне» (cancel culture) тоқталды. Оның айтуынша, жаңа Ата заңда адамның ар-намысы мен қадір-қасиетінің қорғалуына басымдық берілген. Бұл сын айтуға тыйым салу емес, керісінше, жауапты әрі ашық пікірталас мәдениетін қалыптастыруға бағытталған қадам.
