«Таза Қазақстан» жалпыұлттық экологиялық акциясы аясында Ақсу ауданының әкімдігі, «AMANAT» партиясының филиалы, жастар және «Жасыл ел» жасақшылары, мәслихат депутаттарының қатысуымен тазалық күнін өткізді. Акция барысында Ақтоған өзенінің жағасынан саябаққа дейін тазалық жұмыстары жүргізілді.
Ақтоған өзенінің бойындағы пластик және шыны құтылар, басқа да қоқыс қалдықтары қапқа салынып, арнайы орынға жіберілді. Бірер сағатта аумақ ретке келтірілді. Бұл жерде тұрғындардың жауапсыздығын да айта кетуіміз керек. Өздері тұратын жерге керексіз заттарды қалай болса солай лақтыра берген. Тазалық акциясы көптеген адамға ой салды деген ойдамыз. Тазалық шарасынан кейін елді мекен маңы жайнап, жарқырап шыға келді.
Акцияға барлық мемлекеттік мекеме қызметкерлері қатысты. Атап айтсақ, Ақсу ауданы бойынша 100-ден астам партия мүшесі, 9 депутат, 85 мемлекеттік қызметкер бір адамдай шығып, көпке үлгі көрсетті.
Қоқыс шығаруға 3 арнайы техника жұмылдырылды. Акция барысында 3 тоннаға жуық қоқыс шығарылды.
«Таза Қазақстан» партиялық жобасы аясында «Тазалық тал бесіктен» атты акциясы өткізілді. Экологиялық акцияға «Жасыл ел» жасақшылары үлес қосты.
Жанель ЕСІЛҚЫЗЫ,
«AMANAT» партиясы Ақсу аудандық
филиалының кеңесшісі
