Мария Монтессори әдістемесі – бұл ХХ ғасырдың басында итальяндық дәрігер және ағартушы Мария Монтессори жасаған ғылыми педагогикалық жүйе.
Бұл әдіс – балалар дамуын ғылыми бақылауға негіздеп, олардың ортадағы еркіндігі арқылы табиғи оқу қабілетін қолдауға бағытталған. Арнайы орта, шеңбердегі бостандық, дайындалған ересек, баланы бақылау, Монтессори материалдары, сезімтал кезеңдер, тәжірибелік қызмет арқылы оқыту Монтессори әдістемесінің негізгі принциптері.
Ал балаға тәуелсіз, жауапты, өзіне сенімді, таңдау жасау және шешім қабылдауға қабілетті тұлға ретінде дамитын жағдайлар жасау Монтессори әдістемесінің мақсаты. Түпкі мақсат – біртұтас, үйлесімді тұлға тәрбиелеу. Талдықорған қаласында «Алтын Ар Ай Kids бөбекжай – бақшасы» ЖШС 2010 жылдан бастап қызмет атқарса, Монтессори әдісі бойынша 2020 жылдан бастап жұмыс істеп келеді.
Балабақшаның басты ерекшелігі сол – балалар еш мәжбүрлеусіз, қуаныш және қызығушылықпен және айрықша қарқын, құрдастарымен жарыссыз үйренеді. Сабақта балалар ізденімпаз әрі бастамашыл бола біледі. Сондай-ақ, олар өздерін еркін ұстай алады, өзгелерге құрмет көрсетіп, тұрмыстық міндетті тамаша орындайды.
«Жеке шекара» мен «Мен кіммін» дегенге мән береді. Бұл әдіс әлемді зерттеудің ішкі мотивациясын іздеуге үйретеді және мәжбүрлеу мен жазалауға жүгінбейді. Компания Монтессори әдісімен тағы бір балабақша ашуды көздеп отыр. Осы мақсатта олар «Банк ЦентрКредит» АҚ-нан 9% несиеге қол жеткізді. Субсидиялау құралы бойынша бірыңғай кешенді бағдарлама шеңберінде несие бойынша пайыздық мөлшерлеме төмендетіліп, «Даму» қорының кепілдігі берілді.
Айгүл БАЙБОСЫНОВА
