Музей саласының негізгі бағыттарының бірі – қор жұмысы. Ол өз кезегінде жәдігерлерді жинау, сақтау, ғылыми-зерттеу, тіркеу және есепке алу процестерін қамтиды. Жыл бойы музей қорына әр кезеңге жататын, музейлік маңызы бар жәдігерлер қабылданады. Құнды, тарихи экспонаттарды жинау – музей қызметкерлерінің әркез ізденіс нәтижесінде жүзеге асады.
Жетісу облысының тарихи-мәдени қара шаңырағы саналатын Мұхамеджан Тынышбайұлы атындағы облыстық тарихи-өлкетану музейінің қорында 26000-ға жуық экспонат жинақталған. Олардың қатарында ең көне саналатыны тас, қола, темір дәуіріне жататын тас құралдар, бағалы зергерлік бұйымдар, тұрмыстық заттар, қару түрлері, қыш ыдыстар бар. Бүгінде музей қоры тағы да жәдігерлерге толығып отыр. 18 тамыз күні Жетісу облысы, Ескелді ауданының тұрғыны Алдаберген Есенаманов Биғаш ауылынан табылғанбірегей археологиялық заттарды музей қорына табыстады. Олардың қатарында ерте дәуірге жататын тас қайрақтар, қола пышақ пен қола ауыздық, садақ ұштары және түймелер ерекше орын алады. Бұл жәдігерлер – Жетісу жерінің бай тарихынан сыр шертетін, дала өркениетінің құнды мұралары екені даусыз.
Осындай құнды мұраларымызды ғылыми айналымға енгізіп, көпшілікке насихаттап жүрген музей мамандарының еңбегі қашан да ерен. Ал, ұлт тарихын қадір тұтып, оның әрбір мұрасын ұрпақ үшін мұражайға аманаттап жүрген Алдаберген Досжанұлындай ардақты азаматтардың игі істері көпшілікке үлгі. Осындай игі істердің нәтижесінде ұлт руханияты өз құндылығын жоғалтпай, жаңғыра бермек.
Алдағы уақытта жоғарыда қабылданған жәдігерлер музей экспозициясынан орын алып, көпшілік назарына ұсынылатын болады.
Қалқаман АБДРАХМАНҰЛЫ,
Музей редакторы
