Қыркүйек қоңырауы сыңғырлаған сайын мыңдаған бүлдіршін жаңа өмірге қадам басады. Дегенмен, мектеп табалдырығын қуанышпен аттауға бәрінің бірдей жағдайы келе бермейді. Осындай сәтте «Мектепке жол» атты республикалық акция көптің үмітіне демеу болып келеді.
Ескелді ауданында биыл бұл бастама ерекше қарқынмен жүзеге асуда. Аудан әкімінің орынбасары Ж. Байұзақованың қолдауымен білім бөлімі арнайы іс-шара жоспарын жасап, іске кіріскен. Шілде айының соңында мектеп директорлары мен әлеуметтік педагогтарға бағыт-бағдар берілген онлайн жиын өтіп, аудан көлемінде жүйелі жұмыстар атқарылып келеді.
Аудан әкімінің баспасөз қызметі берген мәліметінше, ауданда 105-ке жуық рейд жүргізіліп, көмекке мұқтаж отбасылар анықталған. Мектептердің кіреберісінде «Мектепке жол» деген айшықты баннерлер ілініп, білім бөлімінің ресми парақшаларында күн сайын жаңалықтар жарияланып, тұрғындар науқаннан хабардар болып отыр. Нәтижесінде 1210 баланың тізімі жасақталып, оның ішінде 1164 оқушы мектеп формасы, аяқкиім, сөмке мен оқу құралдарын алып, жаңа оқу жылын алаңсыз бастауға мүмкіндік алған. Жалпы берілген көмектің құны 9,7 миллион теңгеден асады. Қалған балаларға да демеушілер мен мемлекеттік құрылымдар тарапынан көмек көрсетілуде.
«Мектепке жол» – жай ғана науқан емес. Бұл – бірліктің, жанашырлықтың белгісі. Жаңа оқу жылында әр балаға тең мүмкіндік сыйлап, олардың көзіндегі қуанышты көру – ең үлкен жетістік.
Сарби Әйтенова
