Қазақстанда тұтынушылық несие алу талаптары күшейтіледі. Бұл туралы Ұлттық банк төрағасы Тимур Сүлейменов Ұлттық банкте өткен баспасөз мәслихатында мәлімдеді, деп хабарлайды 7-su.kz ақпараттық порталы.
Оның айтуынша, қаржы реттеушісі кредиттік нарықтағы шамадан тыс қызуды тежеу шараларын қолға алып отыр.
«Қарыз жүктемесінің коэффициенті мен қарыздың табысқа қатынасы сияқты өзге де құралдар енгізілуде. Бұл тұтынушылық несиелеу сегментіндегі қызып кетуді төмендетуге мүмкіндік береді. Сондай-ақ агенттік қарыз алушыларды, әсіресе несиелері бойынша мерзімі өткен берешегі бар азаматтарды неғұрлым қатаң бағалау шараларын енгізуді жоспарлап отыр», – деді Тимур Сүлейменов.
Ұлттық банктің мәліметінше, бұл шаралар халықтың қарыз жүктемесін азайтып, қаржы нарығындағы тұрақтылықты қамтамасыз етуге бағытталған.
