Шағын да әсем Текелі қаласының жергілікті тұрғыны Жанна Жаңабаева «Текелі Эко Маркет» дүкенін ашты.
Біз бұған дейін 2 жыл бойы үйде гидролат өндіретін іскер әйел туралы айтқанбыз. Кәсіпкер келіншектің өнімі «Бір ауыл – бір өнім» өңірлік жәрмеңке көрмесінде қазылар алқасының назарына ілігіп, бренд-комитет алдында таныстыруға мүмкіндік алды. Байқауға қатысу істі кеңейтіп, 400 АЕК мөлшерінде грант алуға септігін тигізді.
– Мен шағын экоөнім цехын аштым. Бүгінгі таңда эко-дүкен жұмыс істейді. Өнімдер біздің қаламызда ғана емес, сондай-ақ, бүкіл облыс аумағында сатылады, – дейді Жанна Жаңабаева.
Дүкенде гидролаттан шөптерге дейінгі өнімнің әр түрі бар. Тұтынушы таңдауына мүмкіндік мол. Мәселен, спрей жасау үшін кәсіпкер тек жергілікті шикізатты, яғни көкөністер мен жемістерді және дәрілік шөптерді ғана пайдаланады. Бұл өнім сапасының жоғары болуы мен балғындығына кепілдік береді. Сондай-ақ, оның дүкенінен ашытылған шәй, кептірілген шөптер мен алма сірке суы, қолдан жасалған сабын сатып алуға болады.
Аталған тауарлар жергілікті тұрғындардың да, қала қонақтарының да назарын аудара отырып, тұрақты тұтынудың бар екенін аңғартады. Ендігі кезекте іскер әйел сығымдалған май түрлерін шығаруды жоспарлап отыр. Бұл ой негізінен тұтынушылардың табиғи әрі экологиялық таза өнімдерге қызығушылығының артуына байланысты пайда болған.
Ол үшін Жанна Жаңабаева «Ауыл аманаты» бағдарламасы аясында жеңілдетілген несие алуға өтінім берді. Бұл бастама оның бизнесін нығайтып қана қоймай, жаңа жұмыс орындарын құру арқылы жергілікті өндірісті дамытуға көмектеседі. Жаңа өнім желісінің іске қосылуымен ол салауатты өмір салтын дамытуға және сапалы табиғи өнімдерді танымал етуге жол ашады.
Айгүл Байжұмақызы
Текелі қаласы
