Нұр-Сұлтан қаласында «Жасыл экономика және G-Global-ды дамыту Коалициясы» заңды тұлғалар бірлестігі (ЗТБ) ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссиясының қолдауымен, Coca-Cola халықаралық қоры, Еуропа Қайта құру және даму Банкі мен ЕҚЫҰ ұйымдастыруымен «Ауыл әйелдерінің ауылдағы өмір сапасын арттыру бағытындағы игі бастамалары және ТДМ — 2030 жетістіктері» атты ауыл әйелдерінің III республикалық форумы өтті.
Форум Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі», Қазақстан Республикасындағы 2030 жылға дейінгі отбасылық және гендерлік саясат тұжырымдамасы және Қазақстанда ТДМ – 2030-ға қол жеткізу және «Ауыл — ел бесігі» арнайы жобасы аясында ауылды реформалау, агросекторды экономика өсуінің жаңа драйвері ретінде арттыру жөніндегі үкіметтік бағдарламаларды қолдауға бағытталды.
Республикалық форум өтерден бұрын ұйымдастырушылар тамыз-қазан айлары аралығында еліміздің 163 ауданындағы 2100-ге жуық ауыл әйелінің басын қосып, онлайн режимде 14 облыста облыстық ауыл әйелдерінің жиынын ұйымдастырған болатын. Әлемдік пандемия форум барысында талқыланып жүрген мәселенің өзектілігін арттырып, маңыздылығын еселей түсті. Әсіресе, ауыл шаруашылығын тұрақты дамыту, ауыл тұрғындарының жұмыспен қамтылуын, жеке қосалқы шаруашылықтар мен ауылшаруашылық кооперативтерін құру, ауыл тұрғындарын жұмыспен қамтуға бағытталған мемлекеттік бағдарламаларды ілгерілетуде жүргізіліп жатқан жұмыстардың стратегиялық маңызы зор екендігін дәлелдеді.
Республикалық форум аясында «Ауыл – ел бесігі» бағдарламасы шеңберінде ауылды дамыту», «Мал шаруашылығы фермерлік шаруашылықтарының тұрақтылығын арттыру», «Өсімдік шаруашылығы мен жеміс-көкөніс шаруашылығында өнімділікті арттыру бағытында инновациялық технологияларды қолдану», «Ауылдағы әйелдер бизнесі мен стартаптардың келешегі» атты сессиялық жұмыстар қарастырылды.
Форумның ресми бөлігінде ҚР Парламенті Мәжілісінің депутаты Майра Айсина, ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия төрайымы Ләззат Рамазанова, ҚР Ауыл шаруашылығы министрі Сапархан Омаров, ҚР Еңбек және халықты әлеуметтік қорғау министрі Біржан Нұрымбетов және халықаралық ұйым өкілдері ойларымен бөлісті. Форум барысында ҚР Президенті Әкімшілігі басшысының бірінші орынбасары Дәурен Абаевтың құттықтау хаты оқылса, G-Global Халықаралық Хатшылығының жетекшісі Серік Нөгербеков Хатшылық құрамына кіретін 147 елдің ұйымдары атынан Форум қатысушыларына сәлем жолдады.
Осымен екінші жыл қатарынан Қазақстанда 2030 тұрақты даму мақсаттарын (ТДМ) іске асыруды насихаттау бойынша журналистер арасында республикалық байқау өткізіп келеді. Форумда аталған байқаудың қорытындысы шығарылып, жеңімпаздар марапатталды.
Байқауға эфирде, радиода және баспа БАҚ-та 1 қаңтар мен 20 қазан аралығында жарияланған 170 жұмыс келіп түсіп, байқау комиссиясы бес аталым бойынша 15 өтінімді іріктеп алды.
Сол қатарда «Газеттегі үздік материал» аталымы бойынша бірінші орынды әріптесіміз Қажет Андас иеленсе, екінші орынды республикалық «Заң» газетінің тілшісі Ерлік Кебекбай мен «ФудИндастри КЗ» сайытының тілшісі Жанбота Төлеген, үшінші орынды Қызылорда облысынан республикалық қоғамдық-саяси тәуелсіз апталық «Халық» газеті журналисі Нұрбике Құдайбергенова иеленді. Басқа номинациялар бойынша да жүлдегерлер анықталып, тиісті марапатқа ие болды.
«ЖЕТІСУ-АҚПАРАТ»
