Қазақстанның халық артисі, аты аңызға айналған әнші Нұрғали Нүсіпжанов денсаулығы сыр беріп, аурухана төсегіне таңылғанын мәлімдеді, – деп хабарлайды 7-su.kz ақпараттық порталы Ozgeris.info сайтына сілтеме жасап.
Өнер иесі өзінің әлеуметтік желідегі парақшасында оқырмандарымен сырласып, басынан өткен қиын сәттері туралы тебірене жазды. Әншінің айтуынша, оның жүрегіне күрделі ота жасалған. Қазіргі таңда Нұрғали Нүсіпжанов «Приват» клиникасында дәрігерлердің бақылауында. Өнер майталманы денсаулықтың қадірі ауырған сәтте ғана білінетінін айтып, өмір мен өлім арасындағы ой-толғамдарын бөлісті.
Күрделі отаны жас болса да, өз ісінің нағыз маманы кардиохирург Нұрәлі Есенкелдіұлы жүзеге асырған. Халық артисі дәрігердің кәсібилігіне тәнті болып, оған өзінің ақ батасын берді.
«Адам баласы бір терінің ішінде мың арып, мың семіреді. Аурудың азабын арқалаған адам ғана бұл сөздің түп-төркінін, қадір-қасиетін жақсы біледі. Жүрегіме күрделі ота жасаған Кардиохирург Нұрәлі Есенкелдіұлына, адам жанын аялай білетін дархан дарынына басымды идім», – деп жазды әнші.
Нұрғали Нүсіпжановтың жағдайы қазір тұрақты, ол медицина қызметкерлеріне және өзіне тілеулес болған барша оқырмандарына алғыс білдірді.
Еске сала кетейік, Нұрғали Нүсіпжанов – қазақ ән өнерінің алтын қорына өлшеусіз үлес қосқан тұлға. Оның орындауындағы әндер бірнеше буынның сүйікті туындысына айналған. Қазіргі уақытта әнші отадан кейін оңалту кезеңінен өтіп жатыр.
Посмотреть эту публикацию в Instagram
