Жүргізушінің кептелісте пайдаланылған газды жұтуы онкологияға, жүрек-қан тамырлар және жүйке жүйесі ауруларына, сондай-ақ тері проблемаларына әкелуі мүмкін. Бұл туралы Газетой.Ru-ге онколог Анастасия Косякова айтып берді, — деп хабарлайды Massaget.kz тілшісі.
Ол көліктің терезелері ашық тұрған кезде қауіп айтарлықтай артатынын айтты.
«Адамдар пайдаланылған газдардың зиянын, әсіресе, кептелісте алады. Жазда жүргізушілер терезелерді ашып жүру арқылы жағдайды ушықтырады, өйткені адам оттегімен бірге көміртегі оксидін, көмірсутектерді, альдегидтерді, күкірт диоксидін, күйе, бензапиренді жұтады. Ағзаға жинақталған бұл заттар ауыр ауруларды тудыруы мүмкін. Адамдарда онкологиялық аурулардың пайда болу жағдайлары артып келеді. Өкпе қатерлі ісігінің даму қаупі бар», — деді Анастасия Косякова.
Дәрігердің айтуынша, пайдаланылған газды жұту жүрек-қан тамырлары проблемаларына әкелуі мүмкін және ентігу, бас айналу, жүрек қысылуын тудыруы мүмкін. Сонымен қатар миокард инфарктісі, атеросклероз және тромбоздың дамуына себеп болуы мүмкін.
«Пайдаланылған газ адамға жүйке жүйесі тарапынан жиі әсер етсе, әлсіздік, ашуланшақтық, ұйқының бұзылуы пайда болады. Тері мен көз де зардап шегеді: дерматит пен конъюнктивит дамуы мүмкін», — деп атап өтті сарапшы.
Дәрігердің айтуынша, пайдаланылған газдың жүргізуші ағзасына зиянды әсерін азайтуға кондиционер көмектеседі. Сондай-ақ, рационға мән беру керек: жидектер, жемістер, көкөністер және көк шайда антиоксиданттар бар. Суды көбірек ішу керек, өйткені ол ағзаны уытсыздандырады.
Еске салайық, бұған дейін дәрігер өкпе қатерлі ісігінің 4 белгісін атаған болатын.
Фото: көрнекілікке алынды
