Оңтүстік Корея Қазақстаннан мұнай импорттау бойынша келісімге қол жеткізуге жақындап қалды.
Бұл туралы 7-su.kz ақпараттық порталы Stan.kz сайтына сілтеме жасап хабарлайды.
Таяу Шығыстағы тұрақсыз жағдайға байланысты балама энергия көздерін қарастырып жатқан Корея тарапы Қазақстанмен шикі мұнай жеткізу мәселесінде айтарлықтай ілгерілеуге қол жеткізген. Елдің өнеркәсіп министрі Ким Чон Кванның айтуынша, келіссөздер оң нәтиже беріп отыр.
– Айтарлықтай ілгерілеу бар. Нақты көлемдер мен басқа да мәліметтерді келесі аптаның басында жариялай аламыз деп ойлаймын, – деді министр.
Айта кетейік, осы айдың басында Корея президенті әкімшілігінің басшысы Кан Хун Сик Ким Чон Кванмен бірге Қазақстанға арнайы сапармен келген. Кездесу барысында тараптар Ормуз бұғазы арқылы мұнай тасымалдауда туындаған қиындықтарды ескере отырып, шикі мұнай мен нафта жеткізудің балама бағыттарын талқылаған.
Сарапшылардың пікірінше, бұл келісім Қазақстан үшін экспорттық нарықты әртараптандыруға мүмкіндік берсе, Оңтүстік Корея үшін энергия қауіпсіздігін күшейтуге жол ашады. Сонымен қатар, мұндай әріптестік екі ел арасындағы экономикалық байланысты жаңа деңгейге көтеруі ықтимал.
