Елімізде отандық өнім өндіруге деген талпыныс жылдан жылға артып келеді.
Бұл – халықтың әлеуметтік-тұрмыстық жағдайының басты өлшемі. Десек те өзімізде шығарылатын өнімдердің жақсы жағын халыққа таныту әлі де жеткіліксіз. Әр өңірдің өзіне тән ерекшелігі мен тіршілігі бар. Соның бірі Кербұлақ ауданы. Бұл елді мекенде ауылшаруашылығы мен жеңіл өнеркәсіп салаларының жұмысы қарқынды дамуда.
2021 жылдың мамыр айында іске қосылған «Alacem» ЖШС цемент өндіру зауыты Жетісу жеріндегі ірі өндіріс ошақтарының бірі. Жылына ол 1,2 млн. тонна цемент өндіреді. Өндіріс орнында қазір 560 адам еңбек етеді. Бүгінде зауыт өнімінің жылдық жоспары артты. Осыған байланысты қосымша 40 жұмыс орнын ашу көзделіп отыр.
Зауыт іске қосылғалы бері аудан дамуына 2,7 млрд. теңге қаржылай қолдау көрсетілген. Бұл қаражат Сарыөзек–Көктал жолын жөндеуге және өңірдегі әлеуметтік жобаларға жұмсалды. Өндірістің негізгі шикізаты – әктас, саз, темір кені, домна шлак, гипс, көмір. Инвестициялық жобаны табысты іске асыру Жетісу және Алматы облыстарына оң мультипликативтік әсер беруде.
Айгүл Байжұмақызы
Фото: gov.kz
