Қазақстанның транзиттік әлеуетін арттыру бағытындағы жұмыстар тиісті деңгейде жүрмей жатыр. Премьер-министр Олжас Бектенов көлік-транзиттік саласын дамыту жөніндегі кеңесте бірқатар жобаның баяулығына көңілі толмайтынын білдірді, – деп хабарлайды 7-su.kz ақпараттық порталы.
Үкімет басшысы теміржол вокзалдары мен өткізу пункттерін жаңарту қарқынының тым баяу екенін атап өтті. Әсіресе «Бақты – Аягөз» теміржол желісінің құрылысына жұмыс күші мен қажетті жабдықтардың жеткіліксіз жұмылдырылғаны сынға ілікті. Бектенов мырза теміржол станцияларындағы барлық құрылыс-монтаж жұмысын биылдың соңына дейін аяқтауды кесіп айтты.
Теңіз инфрақұрылымында да кідірістер бар. Атап айтқанда, «Ақтау – Баку» бағыты бойынша алты контейнерлік кемені сатып алу процесі созылып кеткен. Ендігі кезекте Ақтау портында тереңдету жұмыстарын жеделдету және мемлекетаралық түйіспе пункттерінің өткізу қабілетін жылына 100 млн тоннаға дейін жеткізу міндеті тұр.
Азаматтық авиация саласында ілгерілеу байқалады. 2025 жылдың қорытындысы бойынша әуежайларда 31,8 млн адамға қызмет көрсетілген. Елімізде авиаотын бағасының 800 долларға дейін арзандауы әлемдік алпауыт әуе компанияларының (Centrum Air, Martinair, Atlas Air) Қазақстан нарығына келуіне жол ашты.
Дегенмен, Премьер-министр шағын авиацияны дамыту мен жаңа ұшақтар сатып алудағы кемшіліктерді де назардан тыс қалдырмады. 2028 жылға дейін 11 ірі инфрақұрылымдық жобаны, соның ішінде 4 жаңа әуежай құрылысын аяқтау қажет.
Көлік саласын цифрландыру бойынша маңызды қадамдар жасалды:
-
CarGoRuqsat жүйесі енгізіліп, рұқсат бланкілерінің 70 пайызы электронды форматқа көшті.
-
Қытаймен шексіз рұқсат алмасу қамтамасыз етілді.
-
2026 жылдың наурызынан бастап ТМҰ елдерімен e-Permit пилоттық жобасы іске қосылды.
Олжас Бектенов транзиттік бағыттар еліміздің басты бәсекелестік артықшылығы екенін еске салып, барлық тапсырманың орындалуын жеке бақылауына алатынын мәлімдеді.
