Жетісу облысында полиция қызметкері көліктен шыққан өрттің алдын алып, ықтимал апаттың бетін қайтарды, – деп хабарлайды 7-su.kz ақпараттық порталы Polisia.kz сайтына сілтеме жасап.
Оқиға Панфилов ауданында болған. Патрульдік полиция ротасының қызметкері Таңжарық Малікұлы қызмет барысында күдік тудырған көлікті байқайды. Көліктен өткір иіс шыққанын сезген ол бір сәтті де жоғалтпай, шұғыл әрекет етуге көшеді.
Полиция қызметкері дереу өрт сөндіргішті алып, көлікке қарай жүгірген. Кәсібилігі мен жедел шешім қабылдай білуінің арқасында өрттің таралуына жол бермей, дер кезінде сөндірген. Мамандардың айтуынша, жағдай ушыға түскенде көліктің толық жанып кетуі немесе жарылыс қаупі туындауы мүмкін еді. Бұл айналадағы адамдардың өмірі мен денсаулығына айтарлықтай қауіп төндіретін.
– Батыр – марапат күтетін адам емес. Батыр – санаулы секундта шешім қабылдап, әрекет ететін адам. Біздің міндетіміз – әрдайым халықтың жанында болып, қандай жағдай болмасын қорғау, – дейді Таңжарық Малікұлы.
Аталған оқиға төтенше жағдайда жедел әрі дұрыс әрекет етудің қаншалықты маңызды екенін көрсетеді. Қарапайым қызмет барысында қабылданған батыл шешім үлкен қауіптің алдын алуға мүмкіндік берген.
Осындай қызметкерлер үшін «Сенім, бірлік, абырой» ұраны жай сөз емес, күнделікті жұмысының негізгі қағидасына айналған.
