Мемлекет тарихындағы әрбір маңызды кезең халық жадында із қалдырады. Биылғы Жолдау да сондай тағдырлы сәттердің бірі болды. Президент Қасым-Жомарт Тоқаев ел дамуына тың серпін беретін жаңа саяси реформа туралы ой қозғап, халыққа әділетті қоғам құрудың келесі қадамын көрсетті.
Бұл жолы әңгіме парламенттік реформа жайлы болды. Мемлекет басшысы оны бұған дейінгі барлық өзгерістердің заңды жалғасы деп атап өтті. Расында да, соңғы жылдары елімізде жүргізілген саяси жаңғырулар билік пен халық арасындағы ашық диалогқа жол ашты. Ал енді Парламенттің рөлін күшейту – сол өзгерістердің жалғасы әрі демократиялық мәдениеттің өркендеуінің айқын белгісі.
– Біз «Әділетті Қазақстанды» құруға кірістік. «Халық үніне құлақ асатын мемлекет» қағидаты – біздің басты ұстанымымыз. 2022 жылы өткен референдумда халықтың басым көпшілігі «Күшті Президент – ықпалды Парламент – есеп беретін Үкімет» қағидатына дауыс берді. Бұл – елдің болашаққа деген сенімі, – деді Қасым-Жомарт Тоқаев.
Парламенттік реформа жайы Қазақстанда бұған дейін де аз айтылған жоқ. Соңғы жиырма жылдан бері бұл мәселе түрлі деңгейде талқыланып келеді. Демек, бүгінгі бастама – ұзақ уақыттан бері пісіп-жетілген идеяның іске асуы.
Президент Сенаттың тарихи рөліне де тоқталды. Жоғары палата елдің ең күрделі кезеңінде құрылып, тұрақтылықтың тірегіне айналды. Тәуелсіздіктің алғашқы жылдарындағы саяси шайқалуларды еңсеріп, мемлекетке мызғымас іргетас қалағаны – тарихтың ақиқаты. Бүгінде елдің саяси мәдениеті өсіп, азаматтардың белсенділігі артқан тұста Сенаттың міндеті де жаңа мазмұнға ие болмақ.
Саяси реформа дегеніміз – тек билік құрылымындағы өзгеріс емес. Бұл – қоғам мәдениетінің, халықтың азаматтық жауапкершілігінің айнасы. Парламенттің күшеюі – халықтың дауысын естіртіп, пікірін ашық айтуына жол ашатын жаңа дәуірдің басталуы.
Президент айтқандай, реформа – үздіксіз жүретін үдеріс. Бүгін басталған өзгеріс ертеңгі ұрпақтың тағдырына ықпал етеді. Демек, парламенттік реформа – Қазақстанды әділетті, демократиялық, мәдениеті биік мемлекетке айналдырудағы маңызды қадам.
Қазір біз жаңа дәуірдің табалдырығында тұрмыз. Бұл дәуірдің басты ерекшелігі – халықтың сөзі, халықтың еркі, халықтың таңдауы. Сондықтан әрқайсымыз ел болашағына бейжай қарамай, саяси мәдениетімізді арттырып, азаматтық жауапкершілігімізді нығайтуымыз қажет. Әділетті Қазақстан құру – тек Президенттің немесе Парламенттің ғана емес, бүкіл халықтың ортақ ісі.
Ерлік ЖУАСБЕК,
Б. Римова атындағы драма театрының директоры
