Премьер-министр Олжас Бектенов Президент Қасым-Жомарт Тоқаевтың тапсырмасына сәйкес медицина қызметкерлерінің қауіпсіздігін қамтамасыз ету және ауруханалардағы тәртіп мәселесіне арналған кеңес өткізді. Бұл туралы Үкіметтің баспасөз қызметіне сілтеме жасап 7-su.kz ақпараттық порталы хабарлайды.
Кеңеске Премьер-министрдің орынбасары Ермек Көшербаев, Денсаулық сақтау министрі Ақмарал Әлназарова, Ішкі істер министрі Ержан Сәденов және Әділет вице-министрі Лаура Мерсалимова қатысты.
Отырыста Үкімет басшысы бұл мәселенің маңыздылығына ерекше тоқталды:
«Мемлекет басшысының тапсырмасын орындау қажет. Ақ халаттыларға жасалатын кез келген шабуылға заң аясында қатаң тосқауыл қойылуы тиіс. Осыған байланысты Денсаулық сақтау, Ішкі істер және Әділет министрліктеріне 10 күн ішінде медицина қызметкерлеріне қызметтік міндетін атқару кезінде күш қолданғандарға қатысты қылмыстық жауапкершілікке байланысты заңнамаға өзгерістер енгізуді тапсырамын», – деді Премьер-министр.
Сонымен қатар халық арасында профилактикалық және түсіндіру жұмыстарын күшейту тапсырылды.
170-тен астам шабуыл тіркелген
Денсаулық сақтау министрлігінің мәліметінше, 2019 жылдан бері дәрігерлерге, фельдшерлерге, медбикелер мен өзге де медицина қызметкерлеріне қатысты 170-тен астам шабуыл тіркелген.
Министр Ақмарал Әлназарованың айтуынша, қазіргі уақытта бірқатар заңнамалық өзгерістер әзірленіп жатыр. Атап айтқанда:
-
медицина қызметкерлеріне шабуылды құқық қорғау органдары қызметкерлеріне жасалған шабуылмен теңестіру,
-
ауруханаларда кешенді қауіпсіздік жүйесін енгізу,
-
смарт-бейнежетондар мен тәулік бойы полиция бекеттерін орнату қарастырылуда.
Қауіпсіздік шаралары күшейтілуде
Ішкі істер министрі Ержан Сәденовтің хабарлауынша:
-
Перзентханалар мен қабылдау бөлімдерінде тәулік бойы полиция бекеттері қойылған,
-
115 денсаулық сақтау нысаны күзетке алынған,
-
Полиция патрульдерінің бағыты осы мекемелерге жақындатылған.
Еске салайық, бұған дейін Президент Қасым-Жомарт Тоқаев медицина қызметкерлеріне жасалатын шабуылдарға қатысты жазаны күшейтуді тапсырған болатын. Мемлекет басшысы бұл бағыттағы заңнамалық өзгерістерді азаматтық қоғам өкілдерінің қатысуымен Парламентте талқылауды тапсырды.
