Талдықорған қаласында облыстық полиция департаментінің есірткі қылмысына қарсы іс-қимыл басқармасы, «Jetisý jastary» және «AMANAT» партиясы жанындағы «Жастар рухы» жастар қанатының облыстық филиалы бірлесе отырып, «Қабырға – жарнама емес» атты кең ауқымды акция өткізді.
Бұл бастама қоғамды нашақорлықтың зиянынан қорғап, жастардың санасына саламатты өмір салтын сіңіруді мақсат еткен игі шара. Алпысқа жуық еріктілер мен тәртіп сақшылары күні бойы қаланы аралап, тұрғын үйлердің қабырғалары мен аялдамаларға жазылған есірткіге қатысты заңсыз жарнамаларды өшірді. Арнайы құралдармен тазартылған әрбір қабырға жастардың ертеңіне деген қамқорлықтың көрінісіндей. «Жастар рухы» облыстық филиалының төрағасы Қуаныш Сайлаубай:
– Біз полиция департаментімен бірлесіп, жыл басынан бері жүзге жуық осындай шара ұйымдастырдық. Тек Талдықорғанда ғана емес, облыстың барлық ауданы мен елді мекенінде өтіп отыр. Өкінішке қарай, кейде бүгін өшірілген жазу ертең қайта пайда болады. Бірақ біз мойымаймыз, қолдан келгенше күресіп келеміз, – дейді.
Оның айтуынша, жастар арасындағы белсенділік – қоғам денсаулығының айғағы. Себебі, бұл күрес тек бояу мен өшіру жұмысы емес, сананы тазарту жолындағы азаматтық міндет.
Облыстық полиция департаментінің есірткі қылмысына қарсы іс-қимыл басқармасының жедел уәкілі, полиция подполковнигі Меруерт Искакова да мәселенің өзектілігін атап өтті.
– Есірткіге қарсы күресті біз мектеп пен университеттен бастаймыз. Себебі, нашақорлықтың уы алдымен жастардың санасын улайды. Бүгін екінші, үшінші және төртінші ықшамаудандарды тексеріп шықтық. Биыл облыс бойынша есірткіге қатысты 146 құқықбұзушылық тіркелсе, былтыр бұл көрсеткіш 124 болатын. Демек, ахуалдың ушығып келе жатқаны байқалады. Сондықтан алдын алу шараларын күшейту қажет, – дейді ол.
Жастар мен полицияның бірлескен әрекеті қоғамға айқын үлгі. Себебі, бүгін боялған бір қабырға ертең аман қалған бір тағдыр. Ал есірткі жарнамасы – елдің болашағына балта шабатын індет. Ал оны көрмегенсіп өту – үнсіз келісіммен пара-пар. Қала көшелерімен қатар сана да тазарса нашақорлыққа қарсы құқықбұзушылықтың алдын алу мен акцияның нағыз жеңісі сол болмақ.
Санжар СҰЛТАНҒАЗЫ
