Облыстық энергетика және тұрғын үй-коммуналдық шаруашылық басқармасының басшысы Айдос Бекетаевтың айтуынша, облыс бойынша 210 елді мекенді газдандыру жоспарланған. Соның ішінде 108 ауылға көгілдір отын берілсе, жыл соңына дейін бұл көрсеткіш 126 елді мекенге жетпек.
Қайнарлы ауылының тұрғындары үшін бұл оқиға – үлкен қуаныш. Салтанатты шарада аудан әкімінің орынбасары Айдын Исабеков ауыл тұрғындарын көгілдір отынның келуімен құттықтап:
– Құрметті Қайнарлы ауылының тұрғындары, үйлеріңіз жылы, шуақты, мерекелі, берекелі болсын. Шаңырақтарыңыздың түтіні түзу шықсын, – деген ақжарма тілегін арнады.
Ауыл тұрғыны Қаршыға Сақаба ауылға көгілдір отынның келгеніне дән риза. «Бұрын қаланың өміріне қызығатынбыз. Қазір өзіміз де соған жетіп қалдық. Жаңа емхана тұрғызылып, асфальт жол салынды. Енді от жағып әуреленбейміз. Жылына 4-5 тонна көмір алатынбыз. Тасымалымен қосқанда оған қыруар қаржы кетеді. Осының барлығын жасап жатқан азаматтарға рахмет», – дейді ақ жаулықты ана.
Салтанатты шарада алғашқы болып көпбалалы ана Гүлім Тобықбаеваның шаңырағына табиғи газ берілді. Мердігер компания «Golden City DS» отбасының үйін газ желісіне тегін қосып, көпбалалы аналарға деген қамқорлықтың үлгісін көрсетті.
Ескелді ауданы бойынша 33 елді мекеннің 21-і газдандыруға жатады. Бүгінде 19 елді мекен толықтай газбен қамтылған. Көкжазық және Жалғызағаш ауылдарында газ тарату желілерінің құрылысы жүріп жатыр. Сонымен қатар, тұрғындардың өтініші бойынша Теңлік, Биғаш және Жеңдік ауылдарына газ тарту үшін жобалық-сметалық құжаттар әзірленуде. Құрылыс-монтаж жұмыстары келесі жылы басталмақ.
Жобалар толық аяқталған соң келесі жылдың соңына қарай 24 елді мекеннің тұрғындары көгілдір отынның игілігін көреді. Бұл 47,3 мың адамды, яғни, аудан халқының 93 пайызын табиғи газбен қамтамасыз етуге мүмкіндік береді.
Табиғи газ – тұрғындардың күнделікті тұрмысын жеңілдетіп, өмір сүру сапасын жаңа деңгейге көтереді.
Гүлжан ТҰРСЫН
