Бүгін Талдықорған қаласының әкімі Ернат Бәзіл шаһардың іскер әйелдер қауымдастығының өкілдерімен кездесті. Жиында шағын және орта бизнесті дамыту, кәсіпкер әйелдердің бастамаларын қолдау және бизнес жүргізудегі өзекті мәселелер кеңінен талқыланды, – деп хабарлайды 7-su.kz тілшісі.
Кездесу барысында қауымдастық мүшелері өздерінің жаңа бизнес-жобалары туралы баяндап, кәсіпкерлік саласында кездесетін түйткілді мәселелерді ортаға салды.
Өз кезегінде қала әкімі Ернат Бәзіл әйелдердің қала экономикасын дамытудағы рөліне ерекше тоқталып, олардың белсенділігіне жоғары баға берді. Сондай-ақ, әкімдік тарапынан кәсіпкерлік бастамаларды қолдау жұмыстары жалғасатынын жеткізді.
– Шағын және орта бизнес – ел дамуының қозғаушы күші. Біз сіздердің жобаларыңызды жүзеге асыруда әкімдік тарапынан барынша қолдау көрсетуге дайынбыз, – деді қала әкімі.
Мұндай кездесулер кәсіпкерлік саласының дамуына серпін беріп, іскер әйелдердің жаңа бастамаларын жүзеге асыруға жол ашатыны атап өтілді.
