Бүгінде Жетісу облысының орталығында жол жөндеу жұмыстары қарқынды жүріп жатыр. Осыған байланысты Талдықорған қаласының әкімі Ернат Бәзіл шаһардағы бірнеше көшені арнайы аралап, жол сапасын тексеріп қайтты.
Еске сала кетсек, осыдан біраз уақыт бұрын Ернат Дүйсенбекұлы қаладағы Шевченко–Құрманов көшелерінде жер қазу жұмыстары жүргізілгеннен кейін асфальттың дұрыс қалпына келтірілмегенін анықтап, сол аумақта құбыр төсеу жұмыстарын атқарған «Диас Проект» ЖШС-нің жұмысын сынға алған болатын. Сондай-ақ, ол мердігер ұйымға бір апта ішінде олқылықтардың орнын толтырып, жіберілген кемшіліктерді жоюды тапсырған еді. Қазір аталған көшелердегі бүлінген жолдарды қалпына келтіру жұмыстары жалғасып жатыр. Қолға алынған жөндеу жұмыстары апта соңына дейін аяқталады деп күтілуде.
– Талдықорған қаласындағы кез келген құрылыс және инфрақұрылымдық жұмыс, ең алдымен, сапаға негізделуі тиіс. Әрбір мердігер өз міндетіне жауапкершілікпен қарауы керек. Әкімдік тарапынан атқарылып жатқан барлық жұмыстар тұрақты бақылауда болады, – деді шаһар басшысы.
Сала басшыларының айтуынша, өткен жылы Талдықорған қаласы бойынша 54 шақырымға жуық жолға жөндеу жұмыстары жүргізілген. Онда негізінен шаһардағы Жастар-1, Солтүстік-Батыс және 8-ші, 9-шы шағын аудандардың көше жолдары қамтылған. Атап айтқанда, жөнделген жолдардың 29 шақырымы – жаңадан салынған жолдар болса, 14,6 шақырымы күрделі жөндеуден өткізілуі тиіс жолдар болған. Биылғы жылы шаһарда 17 450 шаршы метр жолға ағымдағы жөндеу жасалып, 21 шақырымнан астам жолға күрделі, ал 28 шақырымға жуық жолға орташа жөндеу жүргізу көзделген.
Айдын КӘЛІМХАН
