Осы ойымызға түйін ретінде Талдықорғандағы Ардагерлер үйінде қарттар арасында өткен мүшәйраны айтуға болады. Абай дананың 180 жылдығына орай ұйымдастырылған бұл шараға қала аумағында тұратын қариялар қатысып, шығармаларын сынға салды.
Бұдан бұрынғы жыр бәсекелерінде кітаптары шығып, оқырманға танылып қалған ақындар жүлде бермей жүрген болатын. Бұл жолы көпшіліктің тілегі ескеріліп, танымал ақындар мүшәйраға қатыстырылмады. «Қарттардың да өлеңге бар таласы» деген девизбен ақындыққа жақын ардагерлер жүректерін жарып шыққан туындыларын әділқазылар сарабына салды.
Сөз орайы келгенде әділқазылар алқасы жайында да бірер сөз айта кетейік. Бұл жолы әділқазылар алқасының құрамы да қариялардың өз арасынан іріктелді. Мұның өзі қариялардың қазылар құрамына деген сенімін арттыра түскендей әсер қалдырды. Нақты айтатын болсақ, осындай шараларға бұған дейін де белсене қатысып жүрген жазушы, журналист Кенжехан Рақыш пен Қазақстан Республикасы білім беру ісінің үздігі Жұмабала Балақаранова қазылар құрамында болды.
Мүшәйра тізгінін қолына алған Жазушылар одағының Жетісу облысындағы өкілі ақын Жангелді Немеребай жыр бәсекесінің шарттарымен таныстырып өткеннен кейін қатысушыларды Талдықорған қалалық ардагерлер кеңесі төрағасының орынбасары Мұратбек Қожабеков құттықтады. Келесі кезекте ғалым, филология ғылымдарының кандидаты Сайлау Қожағұлов бүгінгі мүшәйра тақырыбына айналған жайт – Абай ұлағаты, даналық тәлімі жайында ой өрбітті.
Қарты бар үй – қазыналы үй. Ондай ғимаратта ата дәстүрімен алдымен бата берілетіні де белгілі жайт. Соған орай қатысушы Ерболған Бектенов жиналғандарға ақ батасын беріп, ізгі тілегін арнады. Содан кейінгі кезекте әділқазылар алқасының төрағасы Нүсіпбай Әбдірахым мүшәйра қоржынына келіп түскен өлеңдерге шолу жасап, жетістіктері мен жекелеген кемшіліктер жайын айтып өтті.
Баса айтып өтетін бір жайт – мүшәйраға қатысушының бірде-бірі ескерусіз қалмады. Жүлдегерлерге қаржылай сыйлықтар берілсе, ынталандыру ретінде бағалы заттар табыс етілді.
Жыр жарысында жүлделі 1-орынды Бағила Азанбаева жеңіп алса, 2-орынды Нұртай Шынғожанова иеленді. Екі үшінші орынды Төлеухан Құмарбекова мен Бауыржан Жылқыбаевтар өзара бөлісті.
Еркін форматта өткен мүшәйра барысында қатысушылардың барлығы өз өлеңдерін оқыды. Абайдың жан толқытар әндерін орындап, жиналғандар ықыласына бөленген қарияларға да дуылдата қол соғылып, құрмет көрсетілді.
Н. ДОДАБАЙҰЛЫ
