Мемлекет басшысы Қасым-Жомарт Тоқаев еліміздің стратегиялық дамуында ғылымды арқау еткен арнайы аумақтар құру мәселесіне басымдық берді, – деп хабарлайды 7-su.kz ақпараттық порталы.
Президенттің пайымдауынша, заманауи ғылым қалашықтары мен қарқынды дамитын елді мекендер тек зерттеу орталығы ғана емес, сонымен қатар ірі инвестициялар мен озық технологияларды тартудың негізгі нүктелеріне айналуы тиіс. Бұл мақсатты жүзеге асыру үшін арнайы тұжырымдама қабылданып, мықты ғылыми-технологиялық парктер құру жоспарланған.
Мемлекет басшысының тікелей тапсырмасымен Курчатов қаласына ресми түрде ғылым қалашығы мәртебесін беру жұмыстары басталып кетті. Қазіргі таңда Парламент мұндай аумақтардың құқықтық мәртебесі мен қаржыландыру тетіктерін нақтылайтын заң жобасын қарап жатыр.
Жаңа экономикалық модельдің басты жобаларының бірі – Alatau City. Жаңа Конституцияда қарқынды дамитын қалалар үшін арнайы құқықтық режим бекітілгендіктен, бұл шаһар жоғары технологиялар саласындағы халықаралық инвесторлар үшін ең тартымды алаңға айналмақ.
Ғылым мен инновацияны дамыту тек орталықпен шектелмейді. Мемлекет өңірлік деңгейдегі ғылыми әлеуетті көтеруге ерекше назар аударып отыр. Ендігі кезекте жергілікті әкімдерге ғылыми-технологиялық саясатты жүргізу құзыреті берілді. Бұл шешім әр аймақтың өзіндік ерекшелігіне сай инновациялық жобаларды қолдауға мүмкіндік береді.
«Қазақстанның ертеңі қандай болатыны, инновациялық және озық елге айналу мүмкіндігі Сіздердің идеяларыңызға, зерттеулеріңізге, жасаған еңбектеріңіз бен ашқан ғылыми жаңалықтарыңызға тікелей байланысты», – деді Президент ғалымдар қауымына жасаған үндеуінде.
Қасым-Жомарт Тоқаев ғалымдардың жаңа Конституцияның мән-мазмұнын халыққа түсіндірудегі рөлін жоғары бағалады. Оның айтуынша, ғылыми қауымдастықтың күш-жігерін біріктіру арқылы Қазақстанды Еуразиядағы жетекші технологиялық орталықтардың біріне айналдыру әбден мүмкін. Бұл тек экономикалық көрсеткіш емес, елдің егемендігі мен мемлекеттілігін нығайтудың маңызды құралы.
