Биыл еліміздің басты заңы – Қазақстан Республикасының Конституциясына 30 жыл толып отыр. 1995 жылы бүкілхалықтық референдум арқылы қабылданған Ата Заңымыз тәуелсіз Қазақстанның демократиялық, құқықтық және әлеуметтік мемлекет ретінде дамуына берік негіз қалады.
Осы жылдар ішінде Конституция қоғамымыздың тұрақтылығы мен бірлігінің кепілі болып, мемлекетіміздің іргетасын нығайтты. Ол азаматтардың негізгі құқықтары мен бостандықтарын айқындап, ел дамуының басты бағдарын айқындап берді.
Ұлттық ұлан қатарындағы әрбір әскери қызметші үшін Конституция – Отан алдындағы парызын орындаудағы ең басты құжат. Біздер халыққа адал қызмет етуге, елдің қауіпсіздігін қамтамасыз етуге, заңды бұлжытпай орындауға ант берген жандармыз. Сондықтан да Ата Заңды құрметтеу – әскери борышымыздың ажырамас бөлігі.
Тәуелсіздік жылдарындағы жетістіктеріміздің барлығы Конституциямен тығыз байланысты. Бүгінде Талдықорған қаласындағы 5514 әскери бөлімінің жеке құрамы да ел мүддесі жолында абыройлы қызмет етіп келеді. Жас сарбаздарымызға Конституцияның мән-мағынасын түсіндіру, оларды отансүйгіштікке тәрбиелеу – біздің басты міндеттеріміздің бірі.
Қазақстан Конституциясының 30 жылдығы – барша қазақстандықтар үшін ортақ мереке. Бұл күн әрқайсымызды заңға құрметпен қарауға, мемлекетіміздің болашағына жауапкершілікпен атсалысуға үндейді.
Еліміздің көк байрағы биікте желбіреп, Ата Заңымыз әрдайым халқымыздың игілігіне қызмет ете берсін!
Полковник Әмір Мансуров
5514 әскери бөлімінің командирі
Талдықорған қаласы
