Бұл туралы 7-su.kz ақпараттық порталы Aikyn.kz сайтына сілтеме жасап хабарлайды.
Сыртқы істер министрлігінің мәліметінше, қазіргі уақытта Қазақстанда Қытай капиталының қатысуымен жалпы құны 66,4 миллиард долларды құрайтын 224 индустриялық жоба жүзеге асырылып жатыр. Бұл жобалар шамамен 50 мың жаңа жұмыс орнын ашуға мүмкіндік берді. Сонымен қатар, 2005–2024 жылдар аралығында Қытай тарапынан Қазақстан экономикасына 26,4 миллиард доллар көлемінде инвестиция құйылған. Қытай қазіргі таңда еліміздегі ең ірі бес шетелдік инвестордың қатарына кіреді.
Кеңесте Премьер-Министр ҚХР төрағасының Қазақстанға жасаған сапары екіжақты экономикалық қатынастарға тың серпін бергенін атап өтті. Атап айтқанда, Астанада өткен «Орталық Азия – Қытай» индустриялық және инвестициялық ынтымақтастық форумы аясында екі ел арасында 58 коммерциялық келісімге қол қойылды. Бұл құжаттардың жалпы құны 24 миллиард долларды құрайды.
Президент Тоқаев 2029 жылға дейін кемінде 150 миллиард доллар көлемінде шетелдік инвестиция тарту міндетін қойған болатын. Осы мақсатқа жету үшін шикізаттық емес сектор мен экспортқа бағытталған өндірістерге басымдық беру қажет. Олжас Бектенов бұл тұрғыда Қытаймен толыққанды кооперацияны тереңдету аса маңызды екенін атап өтті.
Премьер-Министр Абай, Шығыс Қазақстан және Батыс Қазақстан облыстарында жаңа бірлескен жобалардың жоқтығына алаңдаушылық білдіріп, бұл өңірлерге шетелдік серіктестермен тығыз байланыс орнату жөнінде нақты тапсырмалар жүктеді. Жергілікті билікке қысқа мерзім ішінде бастамалар дайындап, өңірлік делегациялардың Қытай провинцияларына сапарларын ұйымдастыру тапсырылды.
Қазіргі таңда бірнеше аймақтарда нақты жобалар бойынша оң динамика байқалады. Мәселен, Алматы облысында «жасыл» энергетика, логистика, агроөнеркәсіп және өндіріс салаларында жалпы құны 6 миллиард доллардан асатын 7 құжатқа қол қойылды. Сондай-ақ Астана қаласы, Қызылорда және Түркістан облыстары инфрақұрылым, агроөнеркәсіп және өнеркәсіп салаларында бастамалар көтеріп отыр.
Кеңес қорытындысында орталық және жергілікті атқарушы органдарға:
-
Қол қойылған келісімдерді кезең-кезеңімен жүзеге асыру,
-
Жобаларды толық сүйемелдеу,
-
Бірыңғай мемлекеттік инвестициялық саясат аясында жұмыстарды үйлестіру жөнінде нақты міндеттер жүктелді.
