Мемлекет басшысы Қасым-Жомарт Тоқаев Түрікменстанда өткен теңізге шығар жолы жоқ дамушы елдерге арналған БҰҰ-ның үшінші конференциясында сөз сөйледі.
Бұл туралы 7-su.kz ақпараттық порталы Ақордаға сілтеме жасап хабарлайды.
Президент өз сөзінде конференцияны ұйымдастыру бастамасы үшін Түрікменстан Президенті Сердар Бердімұхамедовке, ал теңізге шығатын жолы жоқ елдердің мәселелерін шешуге бейілділік танытқаны үшін БҰҰ Бас хатшысы Антониу Гутерришке ризашылығын білдірді.
– Жиырма жылдан астам уақыт бұрын Қазақстан теңізге шығар жолы жоқ дамушы елдерге арналған БҰҰ-ның алғашқы конференциясын өткізіп, жетекші рөл атқарды. Осы тарихи оқиға барысында Алматы іс-қимыл бағдарламасы қабылданды. Бүгін біз алдымызда тұрған міндеттерді одан әрі ілгерілету мақсатында Авазада бас қосып отырмыз, – деді Мемлекет басшысы.
Президенттің айтуынша, мұндай елдерде жарты миллиардтан астам адам өмір сүреді және олар қаржыландыру, технологияларға қол жеткізу мен жаһандық нарыққа шығуда елеулі кедергілерге тап болып отыр.
– Аймақтағы шектеулі байланыс – теңізге шығар жолы жоқ дамушы елдердің басты проблемасы. Бұл транзит және сауда шығындарының артуына, сондай-ақ геосаяси тұрақсыздықтарға осал болуға себеп. Мұндай кедергілер халықтың әл-ауқатына тікелей әсер етіп, елдердің бәсекеге қабілеттілігін төмендетеді, – деді Қасым-Жомарт Тоқаев.
Сондай-ақ Президент Қазақстанның Аваза іс-қимыл бағдарламасын толық қолдайтынын айтып, бұл құжатты инклюзивті және орнықты даму жолындағы маңызды қадам деп атады.
– Бұл бастама халықаралық даму ұйымдары мен қаржы институттарының саяси қолдауына ие болуы керек. Көлік, энергетика және цифрлық инфрақұрылым салаларына жаңа қаржы тетіктері қажет, – деді Мемлекет басшысы.
Мемлекет басшысы климаттың өзгеруі мәселесін де ерекше атап өтті.
– Теңізге шығатын жолы жоқ көптеген елдер қуаңшылық, су тапшылығы, мұздықтардың еруі мен шөлейттену сияқты табиғи қауіптерге ұшырап отыр. Бұл мәселелерді шешу үшін ортақ күш-жігер мен халықаралық қолдау қажет, – деді Тоқаев.
Осыған орай Президент келер жылы сәуір айында Астанада Біріккен Ұлттар Ұйымымен бірлесіп Өңірлік экологиялық саммит өткізуді ұсынды.
