Қазақстанның мемлекеттік туы Reddit платформасында өткен онлайн дауыс берудің қорытындысы бойынша әлемдегі ең әдемі ту деп танылды.
Платформа қолданушылары ұйымдастырған Flags of the World атты турнирде қатысушылар түрлі елдердің мемлекеттік туларын салыстырып, үздігін анықтаған. Дауыс беру барысында Қазақстанның туы ондаған елдің рәміздерін артта қалдырды.
Жартылай финалда көк ту Сейшел аралдарының туын жеңсе, финалда Кирибати елінің туынан басым түсті. Нәтижесінде турнир қорытындысы бойынша:
екінші орынды – Кирибати туы,
үшінші орынды – Бутан туы,
төртінші орынды – Сейшел аралдарының туы иеленді.
Ұйымдастырушылардың айтуынша, қатысушылар Қазақстанның туын ұсынылған барлық нұсқалардың ішіндегі ең үздігі деп таныған.
– Қазақстан – біздің чемпион! Сіздер дауыс беріп, бұл туды әлемдегі ең үздік ту деп таңдадыңыздар. Қатысқан жандарға рақмет. Бұл ауқымды әрі қызықты жоба болды, – деп жазды турнир ұйымдастырушылары.
Айта кетейік, Қазақстан Республикасының мемлекеттік туы 1992 жылғы 4 маусымда ресми түрде бекітілген. Тудың авторы – суретші Шәкен Ниязбеков.
Дереккөз: Ulysmedia.kz
